Kínversk stjórnvöld leita nú hundraða milljarða dala í ógreiddum sköttum, jafnvel áratugi aftur í tímann. Markmiðið, að sögn Financial Times , er að minnka halla ríkissjóðs og herða eftirlit með skattlagningu auðmanna. Bönkum og fjármálafyrirtækjum hefur verið falið að kanna erlendar fjárfestingar efnaðra Kínverja og hvort tekjur hafi verið gefnar upp. Athyglin beinist meðal annars að hagnaði af fasteignum, hlutabréfum, sjaldgæfum jarðmálmum og rafmyntum, auk eigna í erlendum sjóðum. Sumar athuganir ná aftur til ársins 2000. Bankar hafa unnið með skattyfirvöldum að því að frysta reikninga auðugra viðskiptavina þar til skattar af erlendum eignum, reikningum og sjóðum hafa verið greiddir. Flestir greiða tafarlaust til að fá aðgang að reikningunum á ný. Herferðin er talin eiga sér skýrar fjárhagslegar ástæður. Tekjur kínverska ríkisins hafa staðið nær í stað frá heimsfaraldrinum og lækkuðu um 1,7% í 21,6 billjónir kínverskra júana árið 2025. Tekjur af lóðasölu hrundu úr 8,7 billjónum árið 2021 í 4,15 billjónir eftir samdrátt á fasteignamarkaði. Nýju reglurnar kveða á um 20% skattlagningu tekna af erlendum sjóðum á nokkrum stigum og loka þannig leið sem auðmenn hafa lengi nýtt til að komast hjá skattgreiðslum. Nýja skattakerfið færist nær því sem almennt þekkist innan Bandaríkjanna þar sem skattgreiðendur borga skatt af öllum tekjum, óháð því hvar þeirra er aflað. Hert eftirlit virðist þegar skila árangri, tekjur af tekjuskatti einstaklinga jukust um 11,5% árið 2025, en skatttekjur í heild aðeins um 0,8%. Óvissa ríkir um skattalega heimilisfesti, jafnvel fólk sem dvelur skemur en 183 daga á ári í Kína getur talist skattskylt þar, óháð ríkisfangi þeirra. Lögmaðurinn David Lesperance telur gervigreind gera yfirvöldum kleift að greina fjárfestingagögn hraðar og ódýrar. Að minnsta kosti sex ofurauðugir kínverskir skjólstæðingar hans hafa ákveðið að flytja frá Kína á þessu ári. Kínverska ríkisskattstjórnin svaraði ekki beiðni um umsögn.