Sala bandarískra stjórnvalda á evrum til að styrkja japanska jenið í lok síðustu viku kom Seðlabanka Evrópu í opna skjöldu. Samkvæmt heimildum Financial Times var bankanum ekki tilkynnt um aðgerðina fyrr en viðskiptin höfðu farið fram. Christine Lagarde, forseti Seðlabanka Evrópu, og Scott Bessent, fjármálaráðherra Bandaríkjanna, ræddu inngripið á laugardag. Skortur á samráði þykir undirstrika hversu óvenjuleg þessi sameiginlega aðgerð Bandaríkjanna og Japans var sem er jafnframt sú fyrsta af sinni tegund í nær 30 ár. Yfirleitt hefði verið búist við að Bandaríkin seldu dali en í þetta sinn voru evrur seldar. Sjá einnig Jenið ekki verið veikara í 40 ár Sumir háttsettir embættismenn Seðlabanka Evrópu töldu ákvörðunina fordæmalaust brot á hefðum um samstarf vestrænna seðlabanka og fjármálaráðuneyta. Slíkt samstarf hefur frá lokum síðari heimsstyrjaldar byggst á gagnkvæmu trausti og samráði. Talsmaður bandaríska fjármálaráðuneytisins sagði við Financial Times að ráðuneytið hefði ekki haft samráð við erlend stjórnvöld um ráðstöfun gjaldeyrisforða í Gjaldeyrisjöfnunarsjóði Bandaríkjanna, sem var nýttur við inngripið. „Bandaríska fjármálaráðuneytið tekur ákvarðanir um ráðstöfun eigna sjóðsins með hliðsjón af mati ráðuneytisins og Seðlabanka Bandaríkjanna á lausafjárstöðu markaða, verðmati og öðrum viðeigandi þáttum,“ sagði talsmaðurinn. „Í samræmi við þetta vald breytti ráðuneytið samsetningu gjaldeyrisforða sjóðsins í síðustu viku.“ Bandarísk stjórnvöld kusu að selja evrur þar sem sala á dölum hefði getað verið túlkuð sem tilraun til að veikja Bandaríkjadal og þar með grafið undan stefnu Bessents um sterkan gjaldmiðil. Hagfræðingar og markaðssérfræðingar hafa jafnframt leitt líkur að því að Bandaríkin hafi tekið þátt í inngripinu með Japan til að koma í veg fyrir að japönsk stjórnvöld seldu bandarísk ríkisskuldabréf. Slík sala hefði getað þrýst langtímavöxtum í Bandaríkjunum enn hærra, en fjármagnskostnaður til langs tíma þar í landi er nú nærri því hæsta sem sést hefur í 19 ár. Sjá einnig Lántökukostnaður Bandaríkjanna ekki hærri í 19 ár Samkvæmt mati sérfræðinga, sem byggist á bráðabirgðatölum frá Japansbanka, gætu japönsk stjórnvöld ein og sér hafa varið um 13.800 milljörðum jena, jafnvirði 87 milljarða dala, á tveimur dögum til að styrkja jenið. Japanski seðlabankinn hélt vöxtum óbreyttum í júlí, þótt verðbólguáhætta hafi aukist. Markaðurinn telur helmingslíkur á vaxtahækkun í september. Verðbólga í Bandaríkjunum hjaðnaði í júní en er enn langt yfir tveggja prósenta markmiði Seðlabankans.