Við inngöngu í Evrópusambandið gætu takmarkanir sem nú gilda um erlent eignarhald í íslenskum sjávarútvegi verið felldar úr gildi. Þetta er mat Samtaka fyrirtækja í sjávarútvegi. Í greiningu SFS segir að reynsla annarra Evrópuríkja sýni að landskvóti tryggi hvorki innlent eignarhald né yfirráð yfir nýtingu hans. Dæmi séu um að erlendar útgerðir hafi náð yfirráðum yfir aflaheimildum annarra landa. Heiðrún Lind Marteinsdóttir, framkvæmdastjóri SFS, segir mikla verðmætasköpun á Íslandi úr sjávarútvegi, sérstaklega vegna þess að afurðin sé fullunnin á Íslandi. Aukið eignarhald erlendra aðila í sjávarútvegi gæti leitt til þess að meira af fiski yrði unninn erlendis. Takmarkanir þurfi ekki að gilda á báða bóga Fjárfesting erlendra aðila í íslenskum sjávarútvegsfyrirtækjum er nú takmörkuð við 25% eignarhlut að hámarki. Að mati SFS er nauðsynlegt að halda í þessar takmarkanir verði aðildarviðræðum við ESB haldið áfram. Hingað til hafa ekki gilt sambærilegar takmarkanir um eignarhald íslenskra útgerða í sjávarútvegi annarra landa. „Það er ekki beinlínis hægt að segja að svona hlutir verði að vera gagnkvæmir. Hvert og eitt ríki verður að meta þetta út frá eigin hagsmunum. Það kunna að vera hagsmunir einstakra ríkja að fá erlent fjármagn, erlenda þekkingu og erlenda fjárfestingu til þess að byggja upp atvinnugrein,“ segir Heiðrún Lind. „Íslendingar hafa svo sannarlega þekkinguna í sjávarútvegi og hafa þannig getað byggt upp stöndug og góð fyrirtæki í sjávarútvegi í öðrum löndum. En Íslendingar hér heima – að við þurfum á þekkingu og fjármagni að halda inn í íslenskan sjávarútveg. Það verður kannski seint sagt.“