Gróska ehf., félagið sem á Grósku við Bjargargötu 1 í Vatns­mýrinni, skilaði 605 milljóna króna hagnaði á árinu 2025 sam­kvæmt árs­reikningi félagsins. Rekstrar­tekjur námu 908 milljónum króna og byggja að lang­mestu leyti á leigu­tekjum, auk minni hluta veltu­tengdra samninga. Af­koman litast þó ekki síst af þróun fast­eigna­mats en félagið bók­færði 971 milljónar króna hækkun á virði fjár­festingar­eigna á árinu. Sú breyting vegur þungt í heildarniður­stöðunni, enda eru fjár­festingar­eignir langstærsti eigna­liður Grósku og voru metnar á 14,3 milljarða króna í lok árs. Á móti þessari jákvæðu matsþróun vógu fjár­magns­gjöld áfram þungt, líkt og tíðkast hjá félögum þar sem stór hluti rekstursins byggir á eigna­haldi og skuld­setningu. Árið 2025 var jafn­framt stórt um­breytingarár í eignar­haldi Grósku. Í febrúar 2025 upp­lýsti fast­eignafélagið Heimar kaup­höllina um að sam­komu­lag hefði náðst um helstu skilmála um kaup á öllu hluta­fé Grósku ehf. og Gróður­hússins ehf. og að selj­endur myndu verða meðal stærstu hlut­hafa Heima eftir við­skiptin. Í júní 2025 var síðan til­kynnt að kaupunum hefði verið lokið og upp­gjör farið fram með út­gáfu nýrra hluta í Heimum. Sjá einnig Verða stærstu hlut­hafar Heima eftir sölu á Grósku Sam­kvæmt frétta­til­kynningu í febrúar var heildar­virði við­skiptanna metið 13,85 milljarðar króna og gert ráð fyrir að upp­gjör færi al­farið fram með út­gáfu og af­hendingu 258 milljóna nýrra hluta í Heimum, sem jafn­giltu um 12,5% hlut í félaginu, metið á um 10 milljarða króna á þeim tíma. Sjá einnig Omega kaupir hlut Björgólfs í Heimum Við loka­frá­gang kaupanna í júní kom fram að sömu 258 milljónir nýrra hluta hefðu verið af­hentar selj­endum og að markaðsvirði þeirra væri um 9,5 milljarðar króna miðað við gengi heima. Þá var jafn­framt greint frá því að fjár­festingarfélagið Omega, í eigu Andra Sveins­sonar og Birgis Más Ragnars­sonar, myndi kaupa hlut Björgólfs Thors Björgólfs­sonar í Heimum og verða stærsti hlut­hafi félagsins með 12,5% hlut. Í árs­reikningi Grósku endur­speglast þessi breyting en hlut­hafar voru sex í árs­byrjun en einn í árs­lok, og í árs­lok er allt hluta­féð í eigu Heima hf.