Stjórn Samtaka atvinnulífsins kallar eftir stefnubreytingu stjórnvalda og segir að ákvarðanir hins opinbera hafi unnið gegn markmiðum kjarasamninga um minni verðbólgu, lægri vexti og aukinn stöðugleika. Í ályktun stjórnar SA segir að kjarasamningar á almennum vinnumarkaði haustið 2024 hafi meðal annars miðað að auknum kaupmætti, lægri verðbólgu og vöxtum og aukinni fjárfestingu. Markmiðið um aukinn kaupmátt hafi náðst en ljóst sé að verðbólga verði yfir þeim mörkum sem forsenduákvæði samninganna kveða á um í ágúst. Aðgerðir stjórnvalda grafa undan markmiðum um stöðugleika SA bendir á að verðbólga hafi aukist um 1,5% í desember og janúar eftir að hafa mælst 3,8% fyrir ári síðan og haldist við vikmörk Seðlabankans. Í ályktun SA segir að skatta- og gjaldskrárhækkanir hins opinbera hafi einna helst drifið áfram þessa þróun. Samtökin vísa jafnframt til þess að launahækkanir opinberra starfsmanna hafi farið fram úr þróuninni á almennum vinnumarkaði en launavísitala þeirra hækkaði um 11% árið 2025. „Slíkar ákvarðanir vinna gegn markmiðum kjarasamninga um minni verðbólgu, lægri vexti og stöðugleika,“ segir í ályktuninni. Samtökin hafa einnig áhyggjur af versnandi samkeppnishæfni og auknu atvinnuleysi. Að mati SA þurfa stjórnvöld að skapa fyrirtækjum aukið svigrúm til fjárfestinga og atvinnusköpunar með meira aðhaldi í opinberum rekstri, lægri álögum og einfaldara regluverki. Þá kallar SA eftir breytingum á húsnæðismarkaði og vinnumarkaðslíkaninu. Ríki og sveitarfélög þurfi að tryggja stöðugra framboð byggingarhæfra lóða og einfalda skipulags- og byggingarferla. Jafnframt segir í ályktuninni að það gangi ekki að einstakar stéttir geti knúið fram meiri launahækkanir en samið er um á almennum vinnumarkaði. „Áður en hægt er að skipta verðmætum þarf að skapa þau,“ segir í ályktun stjórnar SA og segist stjórnin jafnframt vera reiðubúin til samtals við stjórnvöld og verkalýðshreyfinguna um aðgerðir til að ná niður verðbólgu og vöxtum og styrkja samkeppnishæfni atvinnulífsins.