Menningarnótt er í dag og búist við um hundrað þúsund gestum í miðbæ Reykjavíkur. Það er að mörgu að huga og ærin verkefni bíða þeirra sem sinna löggæslu og þeirra sem sjá um að ferja gesti Menningarnætur til og frá miðborginni. Leiðarkerfi Strætó er með breyttu sniði í dag. Frítt í skutlþjónustu Strætó Þeir sem ætla að fara á bíl í átt að miðbænum eru hvattir til að leggja í grennd við Laugardalshöll og nýta sér skutlþjónustu Strætó. Skutlur á vegum Strætó, í boði Reykjavíkurborgar, hófu akstur milli Laugardalshallar og Hallgrímskirkju klukkan sjö í morgun. Fram til hádegis munu skutlurnar einnig stoppa við Njarðargötu. Það kostar ekkert í skutlurnar og þær munu keyra fram til 23:15 í kvöld. BSÍ verður endastöð flestra strætóleiða til klukkan 15 í dag vegna götulokana. Eftir klukkan 15 mun endastöðin færast á Skúlagötu. Frítt í tæmingu eftir flugeldasýningu í kvöld Dagskrá Menningarnætur lýkur með flugeldasýningu í kvöld, um klukkan 22. Þá munu strætisvagnar aka frá Sólfarinu, við Sæbraut, í öll hverfi höfuðborgarsvæðisins. Vögnunum verður skipt í sjö leiðir og starfsfólk Strætó verður á Sæbraut til að aðstoða fólk við að finna réttan vagn. Áhersla verður lögð á að koma fólki hratt og örugglega úr miðbænum.