Er­lendir sjóð­stjórar sem hafa fjár­fest í ís­lenskum verðbréfum eru farnir að horfa til þjóðar­at­kvæða­greiðslunnar um hvort hefja eigi aðildar­viðræður við Evrópu­sam­bandið og velta fyrir sér hvaða áhrif mögu­legt já gæti haft á ís­lenska markaði. Þetta kemur fram í frétt Inn­herja, sem greinir frá því að bæði BlueBay, einn stærsti er­lendi fjár­festirinn á ís­lenskum skulda­bréfa­markaði, og eignastýringararmur franska stór­bankans BNP Pari­bas hafi tekið komandi at­kvæða­greiðslu til um­fjöllunar. Mark Dowding, sjóð­stjóri hjá BlueBay, segir í ný­legu frétta­bréfi að félagið muni fylgjast af áhuga með niður­stöðunni. Þar sem já-sinnar mælist með nauma for­ystu geti niður­staða sem leiði til nýrra aðildar­viðræðna „vakið áhuga á ís­lenskum skulda­bréfum og krónunni“, ekki síst í ljósi um 8% skammtíma­vaxta og sterkrar hreinnar er­lendrar stöðu þjóðar­búsins. Sjá einnig Draumurinn um „Sviss norðursins“ úti? BlueBay hefur um ára­bil verið stór fjár­festir í ís­lenskum ríkis­skulda­bréfum og horft jákvæðum augum til ís­lenskra eigna. Sjóðurinn hefur áður vísað til mögu­legrar sam­leitni Ís­lands við Evrópu sem þáttar sem gæti með tímanum lækkað áhættuálag og ávöxtunar­kröfu ís­lenskra bréfa. Fyrir skulda­bréfa­eig­endur myndi slík kröfulækkun að öðru óbreyttu þýða hækkandi verð bréfanna. Inn­herji tekur þó fram að enn sjáist lítil merki þess að inn­lendir eða er­lendir fjár­festar hafi byggt upp stórar stöður á skulda­bréfa­markaði í veðmáli um niður­stöðuna. Franski stór­bankinn varar við fiski­miðunum BNP Pari­bas Asset Mana­gement, einn stærsti eignastýringaraðili Evrópu, fjallaði einnig um at­kvæða­greiðsluna í mánaðar­legu frétta­bréfi sínu. Þar segir að mögu­leg ESB-aðild gæti styrkt stöðu Ís­lands í um­róti alþjóða­við­skipta en um leið „skapað hættu á að auðug fiski­mið Ís­lands opnuðust fyrir er­lendum flotum“, að því er fram kemur í frétt Inn­herja. Það er ekki smávægi­legt at­riði fyrir er­lenda fjár­festa. Í eldri greiningu Arcti­ca Finance, sem Inn­herji hefur einnig greint frá, var niður­staðan sú að eftir­spurn er­lendra félaga eftir ís­lenskum sjávarút­vegs­fyrir­tækjum og afla­heimildum yrði „gífur­leg“ ef Ís­land gengi í Evrópu­sam­bandið. Grein­endur Arcti­ca töldu „nánast öruggt“ að er­lend félög og fjár­festar myndu sækjast eftir kaupum á ís­lenskum sjávarút­vegs­fyrir­tækjum og afla­heimildum. Þeir bentu á mikla samþjöppun í evrópskum sjávarút­vegi síðustu ára­tugi og að stór út­gerðarfélög hefðu keypt afla­heimildir þvert á landa­mæri. „Gjöful mið okkar yrðu aug­ljós­lega eftir­sótt,“ sögðu grein­endur Arcti­ca. Gæti komið meira fjár­magn inn í landið Ás­geir Jóns­son seðla­banka­stjóri sagði eftir síðustu vaxtaákvörðun að það myndi að hans mati ekki hafa bein áhrif á verðbólgu eða megin­vexti Seðla­bankans þótt aðildar­viðræður yrðu hafnar á ný. Hann sagði hins vegar mögu­legt að meira fjár­magn streymdi inn í landið. Er­lendir sjóðir áttu í lok júlí ís­lensk ríkis­skulda­bréf fyrir um 122 milljarða króna að nafn­virði, eða um 7,8% af út­gefnum ríkis­bréfum í krónum. Hlut­fall er­lendra fjár­festa á ís­lenskum ríkis­skulda­bréfa­markaði er því enn lágt í sögu­legum saman­burði. Þótt er­lendir fjár­festar séu þannig greini­lega farnir að horfa til kosninganna er enn langt frá því að markaðurinn hafi verðlagt skjóta ESB-aðild eða upp­töku evru. Það sem virðist vekja áhuga þeirra til skemmri tíma er fremur mögu­legt fjár­magns­inn­flæði, styrking krónunnar og kröfulækkun ís­lenskra skulda­bréfa verði já-ið ofan á.