Hagnaður Hampiðjunnar jókst um ríf­lega 60% á fyrri helmingi ársins þrátt fyrir lítil­lega minni tekjur. Hjörtur Er­lends­son for­stjóri segir sam­dráttinn al­farið skýrast af minni sölu veiðarfæra í kjölfar mikils niður­skurðar á makríl-, kol­munna- og þorsk­kvótum. Á móti hefur fisk­eldi og út­sjávariðnaður vaxið hratt og fram­legð batnað. Hampiðjan skilaði 8,4 milljóna evra hagnaði á fyrri helmingi ársins, saman­borið við 5,2 milljónir evra á sama tíma­bili í fyrra. Tekjur námu 183,2 milljónum evra og drógust saman um 0,9%, en EBITDA nam 24 milljónum evra og stóð nær í stað milli ára. Á öðrum árs­fjórðungi einum námu tekjurnar 85,9 milljónum evra, saman­borið við 94,7 milljónir evra á sama fjórðungi í fyrra. Hagnaður fjórðungsins jókst hins vegar úr 2,3 milljónum evra í 4,4 milljónir evra. EBITDA nam 12,6 milljónum evra, saman­borið við 12,9 milljónir evra árið áður. Hjörtur Er­lends­son, for­stjóri Hampiðjunnar, segir sölu­sam­dráttinn á öðrum fjórðungi al­farið mega rekja til veiðarfæra. „Sam­drátturinn er ein­göngu til­kominn vegna minni sölu á veiðarfærum en það kemur ekki á óvart því minni sala hefur verið viðvarandi frá því síðastliðið haust þegar til­kynnt var um veru­legan niður­skurð á kvótum til makríl- og kol­munna­veiða,“ segir Hjörtur. Makríl­veiði dregst sam­kvæmt honum saman um 48% frá fyrra ári og kol­munna­veiði um 41%. Það hefur orðið til þess að út­gerðir halda aftur af nýfjár­festingum og reyna frekar að lengja líftíma þeirra veiðarfæra sem þegar eru í notkun. Þá hefur minni þorsk­kvóti í Barents­hafi haft veru­leg áhrif, sér­stak­lega í Norður-Noregi. Þorsk­kvótinn þar var skorinn niður um 16% í ár, en aukning ýsu­kvótans vegur aðeins að hluta á móti. Hertar tak­markanir Evrópu­sam­bandsins gagn­vart rúss­neskum út­gerðum hafa sömu­leiðis dregið úr sölumögu­leikum Hampiðjunnar á svæðinu. Fisk­eldi og út­sjávariðnaður vega upp á móti Þótt sala veiðarfæra hafi dregist saman um 10,6% á fyrri helmingi ársins hefur þróunin verið öllu sterkari í öðrum hluta sam­stæðunnar. Sala tengd fisk­eldi jókst um 14,1% og sala í út­sjávariðnaði um 13,5%. Þá jókst sala í móðurfélagi og fram­leiðslu um 21%, meðal annars vegna inn­komu Kohin­oor á Ind­landi og aukinnar fram­leiðslu hjá Hamp­idjan Baltic fyrir út­sjávariðnað. Hjörtur segir nýja fisk­eldis­félagið Eldi hafa farið betur af stað en vænst var. „Eldi, fyrir­tækið sem var stofnað innan sam­stæðu Hampiðjunnar í byrjun ársins til að sinna fisk­eldis­markaðnum, hefur gengið framar vonum,“ segir hann. Verk­efnastaðan í fisk­eldis­búnaði sé góð og bókuð verk­efni í Litáen nái fram til loka október, en svipuð staða sé hjá Kohin­oor á Ind­landi. Fram­legð eftir hráefni og vinnu­laun hækkaði úr 27,1% í 29% á fyrri helmingi ársins. Hærri rekstrar­kostnaður vó þó á móti og rekstrar­hagnaðar­hlut­fall lækkaði lítil­lega, úr 8,8% í 8,6%. EBITDA-hlut­fallið var óbreytt í 13,1%. Sjá einnig Hampiðjan byggir nýjar verksmiðjur á Indlandi Hagstæðari fjár­magns­liðir lyfta hagnaðinum Aukinn hagnaður skýrist að stórum hluta af mun hagstæðari fjár­magns­liðum en á síðasta ári. Gengis­munur var jákvæður um 567 þúsund evrur á fyrri helmingi ársins, saman­borið við neikvæðan gengis­mun upp á tæpar tvær milljónir evra árið áður. Fjár­magns­liðir í heild lækkuðu þannig úr rúm­lega átta milljónum evra í 5,3 milljónir evra. Á sama tíma var rekstrar­af­koman að mestu stöðug. Rekstrar­hagnaður nam 15,8 milljónum evra saman­borið við 16,2 milljónir evra í fyrra. Hagnaðar­talan milli ára skýrist einnig af því að á fyrra ári féll 1,8 milljóna evra tap vegna af­lagðrar starf­semi inn í upp­gjörið, en engin slík starf­semi var á fyrri helmingi þessa árs. Býst áfram við þrýstingi í veiðarfærum Hjörtur gerir ráð fyrir að lægri kvótar muni áfram hafa neikvæð áhrif á sölu flot­trolla í haust og vetur. Hampiðjan hefur brugðist við með hag­ræðingu og fækkun starfs­manna þar sem þess hefur verið kostur, án þess að skerða þjónustu eða við­bragðs­flýti. Hann bendir þó á að staða annarra veiði­stofna í Norður-At­lants­hafi sé al­mennt stöðug og stór hluti veiðarfærasölunnar tengist botn­vörpu­veiðum á meðal annars þorski, ýsu og rækju. Góð loðnu­vertíð hér á landi hefur einnig skapað aukin verk­efni. Meiri notkun nóta eftir tvö loðnu­leysisár hefur skilað Hampiðjunni vinnu við yfir­ferð, við­gerðir og undir­búning fyrir næstu vertíð. Stór upp­bygging á Ind­landi Sam­hliða þessu heldur Hampiðjan áfram um­fangs­mikilli upp­byggingu í Auric á Ind­landi eftir kaupin á Kohin­oor. Þar eru í byggingu tveir 28 þúsund fer­metra fram­leiðslu­salir, auk skrif­stofu- og þjónustu­húsnæðis. Fyrri fram­leiðslu­salurinn á að verða til­búinn í lok október og sá seinni um áramót. Hluti neta­fram­leiðslu verður í kjölfarið fluttur frá Lit­háen til Ind­lands. Hjörtur segir mikla hag­ræðingu fylgja flutningnum þar sem fram­leiðslu­kostnaður á Ind­landi sé aðeins brot af sam­svarandi kostnaði í Evrópu. „Árið 2028 gæti því orðið fyrsta rekstrarárið þar sem nánast allar stærri hag­ræðingarað­gerðir, breytingar og framtíðar­upp­bygging eru komnar á þann stað sem stefnt hefur verið að undan­farin ár eftir hluta­fjárút­boðið sumarið 2023,“ segir Hjörtur. Vaxta­berandi skuldir Hampiðjunnar námu 225,2 milljónum evra í lok júní, saman­borið við 211,4 milljónir evra um síðustu áramót. Hand­bært fé nam 24,1 milljón evra og eigin­fjár­hlut­fallið var 49,3%.