Sam­dráttur mældist í ís­lenska hag­kerfinu á öðrum árs­fjórðungi ársins. Sam­kvæmt fyrsta mati Hag­stofu Ís­lands dróst lands­fram­leiðsla saman um 1,1% að raun­virði miðað við sama tíma­bil í fyrra. Sam­drátturinn er enn meiri þegar horft er til þróunar frá fyrsta árs­fjórðungi ársins. Á ár­stíða­leiðréttum grunni dróst lands­fram­leiðsla saman um 3,0% milli árs­fjórðunga. Aukinn halli á vöru­við­skiptum vegur þyngst í niður­stöðunni. Fram­lag vöru­við­skipta til hag­vaxtar var neikvætt um 2,9 pró­sentu­stig á öðrum árs­fjórðungi. Vöruút­flutningur dróst saman um 13,8% að raun­virði á sama tíma og vöru­inn­flutningur jókst um 1,4%. Vöru- og þjónustu­við­skipti við útlönd voru sam­tals neikvæð um 87,8 milljarða króna á árs­fjórðungnum, saman­borið við 66,2 milljarða halla á sama tíma­bili í fyrra. Vöru­skipta­hallinn nam 154,4 milljörðum króna en af­gangur af þjónustu­við­skiptum 66,6 milljörðum. Þrátt fyrir sam­drátt í lands­fram­leiðslu jukust þjóðarút­gjöld um 1,6% að raun­virði þegar tekið er til­lit til birgða­breytinga. Einka­neysla jókst um 0,8%, sam­neysla um 1,2% og fjár­muna­myndun um 5,7%. Hag­stofan bendir þó á að inn­lend neysla hafi al­mennt haldið áfram að hjaðna. Sam­dráttur varð í kaupum heimila á bif­reiðum og óvaran­legum neyslu­vörum og vöxtur í þjónustu­tengdri neyslu var minni en síðustu misseri. Fjár­muna­myndun at­vinnu­veganna jókst hins vegar um 10,1% að raun­virði. Þar vó fjár­festing í gagna­vers­tengdum iðnaði þungt og var um metárs­fjórðung að ræða. Fjár­muna­myndun hins opin­bera dróst aftur á móti saman um 5,0% og íbúða­fjár­festing um 3,7%. Birgða­breytingar höfðu einnig neikvæð áhrif á hag­vöxt. Heildar­verðmæti birgða lækkaði um 15,5 milljarða króna frá fyrsta árs­fjórðungi og var fram­lag birgða­breytinga til hag­vaxtar neikvætt um 0,8 pró­sentu­stig. Mest munaði um 12,4 milljarða sam­drátt í birgðum sjávarút­vegs. Á ár­stíða­leiðréttum grunni jókst einka­neysla aðeins um 0,1% milli árs­fjórðunga og sam­neysla um 0,4%. Fjár­muna­myndun jókst hins vegar um 18,5%. Út­flutningur dróst saman um 6,7% á sama tíma og inn­flutningur jókst um 13,1%. Vinnu­magn í hag­kerfinu dróst jafn­framt saman. Heildar­fjöldi unninna stunda var 0,9% minni en á öðrum árs­fjórðungi í fyrra, þrátt fyrir að starfandi fólki hafi fjölgað um 0,9%. Þrátt fyrir sam­drátt á öðrum árs­fjórðungi er hag­vöxtur enn jákvæður þegar litið er til fyrri helmings ársins í heild. Lands­fram­leiðsla fyrstu sex mánuði ársins var 1,3% meiri að raun­virði en á sama tíma­bili árið 2025. Hag­stofan endur­skoðaði jafn­framt fyrri tölur um þjóðhags­reikninga fyrir árin 2023 til 2025, meðal annars vegna nýrra upp­lýsinga um þjónustu­við­skipti, sam­neyslu og fjár­muna­myndun hins opin­bera.