Breski auðkýfingurinn Jim Ratclif­fe og Ineos eru að byggja upp nýja starf­semi í Dan­mörku þar sem gömul olíu- og gasmann­virki í Norður­sjó verða nýtt til að geyma kol­tvísýring undir hafs­botni. Verk­efnið nefnist Project Greensand og byggir meðal annars á Nini West-bor­pallinum undan ströndum Dan­merkur. Þar verður gömlum olíu­brunnum snúið við. Í stað þess að dæla olíu upp verður fljótandi kol­tvísýringi dælt um 1.800 metra niður í berglög þar sem honum er ætlað að vera varan­lega geymdur. Þegar starf­semin hefst verður verk­efnið fyrsta kol­efnis­geymslan í Norður­sjó sem rekin er á við­skipta­legum grunni. Þegar það verður komið í fullan gang er stefnt að því að geyma allt að átta milljónir tonna af kol­tvísýringi á ári. Ineos hefur einnig fjár­fest í sér­stöku skipi, Carbon Destroyer 1, sem mun flytja fljótandi kol­tvísýring frá Esb­jerg út á haf og dæla honum niður í geymslurnar. Ratclif­fe sér fyrir sér að slík skip geti orðið fleiri ef starf­semin stækkar. The Telegraph segir að danska verk­efnið geti orðið nokkurs konar fyrir­mynd fyrir framtíð Norður­sjávar eftir því sem olíu- og gas­vinnsla dregst saman. Styrkur verk­efnisins felist einkum í því að nota mann­virki sem þegar eru til staðar, í stað þess að byggja allt kerfið frá grunni. Blaðið ber Dan­mörku sér­stak­lega saman við Bret­land. Ineos hafði áður reynt að þróa sam­bæri­legt verk­efni á breska hluta Norður­sjávar en segir reglu­verk, kostnað og skrifræði hafa staðið í vegi fyrir því. Fyrir­tækið sneri sér því að Dan­mörku þar sem verk­efnið hefur komist hraðar áfram. Að mati Telegraph sýnir Project Greensand hvernig hægt sé að finna nýtt hlut­verk fyrir verðmæt olíu- og gasmann­virki þegar hefðbundin vinnsla minnkar og byggja um leið upp nýja at­vinnu­grein í kringum flutning og geymslu kol­tvísýrings.