Frumvarp Lilju Rafneyjar Magnúsdóttur um afturköllun kvótasetningar á grásleppu var samþykkt á Alþingi í dag. Á næsta fiskveiðiári verða veiðar á grásleppu því aftur byggðar á sóknardögum, ekki kvóta. Sumarið 2024, fyrir síðustu alþingiskosningar, var samþykkt á Alþingi að grásleppuveiðum yrði stjórnað með kvóta. Fram að því höfðu sjómenn mátt veiða eins mikið og þeir vildu en aðeins í ákveðinn fjölda daga á ári. Kvótasetningin var umdeild, bæði á þingi og í sjávarútvegi. Þeir sem mótmæltu vísuðu til reynslunnar af kvótakerfinu og vöruðu við því að aflaheimildirnar myndu safnast á fárra hendur. Markmið laganna var að efla öryggi sjómanna og tryggja arðsemi. Rökin voru að kvótinn gerði sjómönnum kleift að haga veiðum eftir sinni hentisemi í stað þess að þurfa að sækja sjóinn á ákveðnu tímabili hvernig sem viðraði. Framsal veiðiheimilda var bannað til loka ágúst 2026 og nýliðunarpottur átti að tryggja aðgengi að veiðiheimildum. Lilja Rafney lagði málið fram á síðasta þingi. Hún lagði frumvarpið fram aftur að mestu óbreytt í október. Grásleppukvóta var úthlutað í september í fyrra og veiðar eru hafnar. Frumvarpið var samþykkt með breytingartillögum um að nýju lögin taki gildi í haust svo ekki þurfi að stöðva veiðar. Þingmenn minnihlutans hafa gagnrýnt meðferð málsins og vilja skoða hvort frumvarpið brjóti gegn eignarréttarákvæðum stjórnarskrárinnar. Þeir hafa velt því upp hvort ríkið baki sér hættu á skaðabótaskyldu gagnvart þeim sem fengu úthlutaðan kvóta. Hanna Katrín Friðriksson, atvinnuvegaráðherra, sagði á opnum fundi Atvinnuveganefndar Alþingis í vikunni að meirihlutinn teldi það hafa verið skoðað frumvarpið fyllilega. Hún útilokaði þó ekki að kvótahafar sem teldu á sér brotið gætu viljað leita réttar síns.