Christop­her Rokos, milljarðamæringur og stofnandi vogunar­sjóðsins Rokos Capi­tal Mana­gement, hefur ákveðið að flytja skatta­lega heimilis­festi sína frá Bret­landi til Grikk­lands. Hann bætist þar með í hóp auðugra ein­stak­linga sem hafa yfir­gefið Bret­land eftir breytingar á skatt­kerfi landsins. Rokos var sam­kvæmt lista The Sunday Times þriðji hæsti skatt­greiðandi Bret­lands árið 2025 og greiddi um 330 milljónir punda í skatta. Miðað við um 163 krónur fyrir pundið jafn­gildir það tæp­lega 54 milljörðum króna. Til saman­burðar segir Telegraph skatt­greiðslur hans á síðasta ári hafa jafn­gilt saman­lögðum skatt­greiðslum um 21 þúsund breskra heimila. Meðalskatt­greiðsla heimilis er þar sögð um 15.700 pund á ári, eða um 2,6 milljónir króna. Rokos er 55 ára og einn þekktasti fjár­mála­maður Lundúna­borgar. Vogunar­sjóður hans stýrir meira en 20 milljörðum dala og eignir hans sjálfs eru metnar á um fjóra milljarða dala sam­kvæmt Bloom­berg Billionaires Index. Grikk­land býður fasta skatt­lagningu Ákvörðun Rokos kemur í kjölfar þess að breska ríkis­stjórnin af­nam svo­nefnt non-dom-fyrir­komu­lag í apríl í fyrra. Eftir breytinguna eru er­lendar tekjur ein­stak­linga sem búa í Bret­landi einnig skatt­lagðar þar. Grikk­land býður hins vegar eig­endum mikilla er­lendra tekna sér­stakt fyrir­komu­lag þar sem greiddur er fastur skattur, 100 þúsund evrur á ári, af er­lendum tekjum í allt að 15 ár. Miðað við þá upp­hæð sem Telegraph gefur upp, um 86 þúsund pund, jafn­gildir skatturinn um 14 milljónum króna á ári. Til að eiga rétt á fyrir­komu­laginu þurfa er­lendir ein­staklingar jafn­framt að fjár­festa að minnsta kosti 500 þúsund evrur í Grikk­landi, til dæmis í fast­eignum, fyrir­tækjum eða verðbréfum. Gaf Cam­brid­ge 31 milljarð Rokos hefur ekki aðeins verið stór skatt­greiðandi heldur einnig einn stærsti góð­gerðar­gjafi Bret­lands. Fyrr á þessu ári gaf hann Cam­brid­ge-háskóla 190 milljónir punda til að koma á fót Rokos School of Govern­ment. Sú fjár­hæð jafn­gildir um 31 milljarði króna miðað við núverandi gengi pundsins. Hann stendur jafn­framt að um­fangs­miklum endur­bótum á Totten­ham Hou­se, sögu­frægu setri sínu í Wilts­hire, sem talið er hafa um eitt hundrað her­bergi. Fram­kvæmdirnar eru metnar á 175 milljónir punda, eða um 28,5 milljarða krón Rokos stofnaði Rokos Capi­tal Mana­gement árið 2015 eftir að hafa áður starfað hjá Brevan Howard. Þar hafði hann unnið með Alan Howard, stofnanda sjóðsins, sem sjálfur flutti frá Bret­landi til Sviss á síðasta ári. Fleiri auð­menn hafa farið Brott­för Rokos er sú nýjasta í röð sam­bæri­legra til­fella eftir breytingarnar á breska skatt­kerfinu. Ís­lenski fjár­festirinn Björgólfur Thor Björgólfs­son flutti skatta­lega heimilis­festi sína frá Bret­landi til Ítalíu á síðasta ári. Þar geta er­lendir auð­menn greitt fastan 300 þúsund evra árs­skatt af er­lendum tekjum. Guil­laume Pousaz, stofnandi Checkout.com, og egypski milljarðamæringurinn Nassef Sawiris hafa einnig yfir­gefið Bret­land eftir breytingarnar. Telegraph tengir þróunina við vaxandi áhyggjur meðal auðugra ein­stak­linga af frekari skatta­hækkunum. Ný fjár­lög verða kynnt í Bret­landi 28. október og stjórn­völd hafa ekki úti­lokað frekari hækkun skatt­byrðar. Breska ríkis­stjórnin hefur hins vegar hafnað því að brott­flutningur ein­stakra auðmanna sýni að landið sé orðið ó­að­laðandi fyrir fyrir­tæki og fjár­festa. Rokos hefur sjálfur ekki tjáð sig opin­ber­lega um ákvörðunina.