Ríkis­stjórnin virðist full­meðvituð um að hækkun banka­skattsins geti að hluta lent á lántak­endum, þrátt fyrir yfir­lýst mark­mið stjórn­valda um að skapa skil­yrði fyrir lægri vexti. Banka­skatturinn verður sam­kvæmt fjár­laga­frum­varpi næsta árs hækkaður um 75% og er gert ráð fyrir að hækkunin skili ríkis­sjóði sex milljörðum króna í viðbótar­tekjur. Daði Már Kristó­fers­son fjár­málaráðherra viður­kenndi sjálfur í viðtali við hlað­varpið Chess After Dark 15. ágúst að bankarnir myndu ekki bera kostnaðinn einir. Þegar spyrill spurði hvort vextir á láni hans myndu ekki hækka þegar banka­skatturinn færi í gegn svaraði Daði: „Já, þetta mun dreifast á milli þín og bankans með ein­hverjum hætti.“ Daði sagði jafn­framt í sama viðtali að fjár­magns­kostnaður væri þegar orðinn slíkur að ungt fólk ætti erfitt með að komast inn á fast­eigna­markaðinn. Þor­gerður Katrín Gunnars­dóttir, for­maður Viðreisnar og nú ráðherra í ríkis­stjórninni, talaði á svipuðum nótum á Alþingi árið 2019 þegar hún gagn­rýndi þáverandi banka­skatt. „Banka­skatturinn hefur tvíþætt áhrif, annars vegar getur hann haft og hefur áhrif á aukinn kostnað bankanna sem skilar sér náttúr­lega beint út í verðlag til við­skipta­vina bankanna,“ sagði Þor­gerður þá. Sjá einnig Þorgerður sagði bankaskattinn fara beint út í verðlag Hún sagði skattinn jafn­framt „allt of háan“ í saman­burði við hin norrænu ríkin og gagn­rýndi að fyrir­hugaðri lækkun hans hefði verið frestað. Eins og Við­skipta­blaðið greindi frá í ítar­legri frétta­skýringu í vikunni sker ís­lenska banka­kerfið sig þegar veru­lega úr í sértækri skatt­lagningu. Sam­kvæmt saman­burði KPMG verður sértæk skatt­byrði ís­lenskra banka eftir hækkun ríkis­stjórnarinnar meira en sjöföld á við meðal­tal saman­burðarríkjanna. Það færir ís­lenska banka­kerfið enn lengra frá því skatta­um­hverfi sem bankar annars staðar á Norður­löndum og í Vestur-Evrópu búa við. Hærri skatt­byrði lána­stofnana getur skilað sér með ýmsum hætti, meðal annars í hærri útlánaálögum, verri inn­lánskjörum, minni útlána­getu eða lægri arð­semi eig­enda. Stjórn­völd hækka því nú veru­lega skatt sem tveir ráðherrar ríkis­stjórnarinnar hafa áður sjálfir viður­kennt að geti skilað sér í verri lánskjörum og auknum kostnaði fyrir venju­legt fólk. Sjá einnig Skatta­hækkunin vinnur gegn lægri vöxtum