„Þetta hefur gengið vel og verðið er rosalega hátt. Ég hef aldrei séð annað eins,“ segir Ragnar Smári Guðmundsson, framkvæmdastjóri Fiskmarkaðar Íslands. Ragnar segir að meðalverð yfir allar tegundir á mörkuðunum hafi verið 465 krónur á kílóið á fiskveiðiárinu sem nú er nýlokið, samanborið við 379 krónur árið á undan. Það er 23 prósenta hækkun milli ára. Mjög mikill stöðugleiki í framboðinu Hækkunin nær að sögn Ragnars nokkurn veginn yfir línuna af tegundum. Meðalverð á þorski fór úr 536 krónum í 651 krónu, ýsan úr 325 krónum í 439 krónur og ufsinn úr 222 krónum í 312 krónur. Karfinn stóð þó nánast í stað, fór úr 237 krónum í 243 krónur. Umsvifin sjálf hafa hins vegar lítið breyst. „Það er mjög mikill stöðugleiki í framboðinu,“ segir Ragnar. Íslendingar einir að afhenda Skýringarnar á verðhækkununum liggja að sögn Ragnars fyrst og fremst utan Íslands. „Það hefur verið meiri eftirspurn eftir fiski frá Íslandi því það hefur veiðst minna af þorski annars staðar, í Noregi og Barentshafinu,“ segir Ragnar. Það sé því þrýstingur að utan, bæði hvað snerti unninn og óunninn fisk. „Íslendingar virðast vera þeir einu sem eru að afhenda.“ Kaupendur þorsks haldi upp verði á öðrum tegundum Ragnar bendir á að umræðan um útflutning á óunnum fiski sé ekki eins einföld og hún sé stundum sett fram. Kaupendurnir sem sæki í þorskinn og ýsuna á mörkuðunum séu jafnframt þeir sem haldi uppi verði á öðrum tegundum. Aukategundir fylgi með „Allar þessar aukategundir sem við erum að veiða – ufsi, steinbítur, hlýri, keila, þykkvalúra og svo framvegis – við erum að fá gott verð fyrir þær af því að menn eru að taka þær með í útflutning líka,“ segir Ragnar. „Ef við myndum loka á útflutning á þorski og ýsu, hvert færu þá verðin á öllum þessum aukategundum sem fáir eða enginn er að vinna á Íslandi? Sá markaður gæti bara horfið. Þetta er ekki bara svart og hvítt eins og margir halda. Allar ákvarðanir hafa afleiðingar.“ Strandveiðimenn njóti þess að landa þegar framboð sé minna Í sumar var stunduð strandveiði fram í ágúst, nokkrum vikum lengur en í fyrra, og verð var hátt. Ragnar segir strandveiðimenn njóta þess að landa þegar framboð sé minna. „Þeir eru kannski að veiða á þeim tímum þegar aðrir eru ekki að veiða, sumir eru þá orðnir kvótalausir og aðrir stopp í sumarfríi.“ Hátt verð geti skapað hættu Seljendur eru að vonum sáttir en Ragnar tekur undir áhyggjur þeirra sem telja hátt verð geta haft sínar skuggahliðar. „Ég held að sú hætta sé alltaf fyrir hendi að menn erlendis fari að sækja í eitthvert ódýrara prótein í staðinn fyrir fiskinn,“ segir hann. Bíða bara eftir vertíðinni Nýja fiskveiðiárið fer hægt af stað, eins og oft er á haustin. „Þetta fer þokkalega rólega af stað hjá okkur. Haustið er oft þannig og svo bíðum við bara eftir vertíðinni frá janúar og fram í apríl. Menn eru bara spenntir.“