Yfir­vofandi verk­fall flug­virkja Icelandair gæti haft veru­leg áhrif á af­komu félagsins verði ekki samið áður en vinnustöðvun hefst 23. septem­ber. Þetta kemur fram í nýrri greiningu Akkurs, þar sem Alexander Jen­sen Hjálmars­son greiningaraðili metur áhrif mögu­legs verk­falls og hækkandi elds­neytis­verðs á rekstur og virði Icelandair. Félag ís­lenskra flug­virkja hefur boðað ótíma­bundið verk­fall flug­virkja Icelandair frá klukkan 00:01 þann 23. septem­ber. Akkur áætlar að al­gjör kyrr­setning flug­flotans kosti félagið um 6,2 milljónir dala á dag í EBITDA, þegar meðal annars er tekið til­lit til tapaðra tekna og bóta­skyldu sam­kvæmt reglum ESB um réttindi flug­farþega. Á einni viku myndi slíkt verk­fall kosta um 44 milljónir dala, jafn­virði um 22% af áætlaðri EBITDA Icelandair fyrir árið í heild. Akkur telur jafn­framt að slík niður­staða myndi gera EBIT, rekstrar­hagnað félagsins fyrir fjár­magns­liði og skatta, neikvæðan á árinu. Áhættan eykst hratt eftir því sem vinnustöðvun dregst á langinn. Tvær vikur með öllum flug­flotanum á jörðu niðri gætu kostað félagið um 87 milljónir dala í EBITDA, sem jafn­gildir um 43% af áætlaðri EBITDA ársins. Akkur metur áhrif slíkrar sviðs­myndar á virði félagsins á um 0,26 krónur á hlut, eða um 16% af 1,67 króna verðmati greiningar­fyrir­tækisins. Fordæmið frá 2017 mildara Akkur bendir þó á að algjör kyrrsetning flugflotans sé ekki eina mögulega niðurstaðan verði af verkfalli flugvirkja. Í verkfalli flugvirkja árið 2017 stóð vinnustöðvunin í þrjá daga og var um helmingi flugáætlunarinnar aflýst. Endurtaki sú sviðsmynd sig nú metur Akkur að áhrifin á EBITDA Icelandair yrðu um 9 milljónir dala, eða sem nemur 5% af áætlaðri EBITDA félagsins á árinu. Stæði hálf flugáætlunin niðri í sjö daga yrðu áhrifin hins vegar um 22 milljónir dala. Yrði allur flotinn kyrrsettur í viku gætu áhrifin numið um 44 milljónum dala, eða um 22% af áætlaðri EBITDA ársins. Akkur telur þó að sterkir fjárhagslegir hvatar séu fyrir báða aðila til að ná samkomulagi áður en til vinnustöðvunar kemur. Greiningarfyrirtækið áætlar árlegan launakostnað vegna flugvirkja hjá Icelandair á bilinu 30 til 45 milljónir dala. Tíu prósentustiga munur á afstöðu samningsaðila samsvari samkvæmt útreikningum Akkurs aðeins um hálfum degi af kostnaði við algjöra kyrrsetningu flotans. „Fjárhagsleg rök hníga að því að samið verði snemma,“ segir í greiningunni. Akkur vísar þar jafnframt til reynslunnar frá árinu 2017, þegar verkfallinu lauk eftir þrjá daga Bóta­skylda hverfur ekki í verk­falli eigin starfs­manna Verk­fallið hefur jafn­framt þá sér­stöðu að Icelandair getur ekki sjálf­krafa komist hjá bóta­skyldu sam­kvæmt EU261-reglunum með vísan til þess að eigin starfs­menn séu í verk­falli. Akkur miðar við um 15 þúsund farþega á dag í septem­ber og um 330 dala meðal­tekjur á hvern farþega. Í út­reikningum fyrir­tækisins er gert ráð fyrir að hluti kostnaðar sparist þegar flugi er aflýst, en á móti komi meðal annars bætur til farþega. Akkur bendir á að bætur upp á 400 til 600 evrur geti átt við vegna verk­falls eigin starfs­manna. Mögu­leikinn á að komast hjá bóta­skyldu með 14 daga fyrir­vara sé ekki fyrir hendi fyrr en 28. septem­ber, og þá aðeins vegna flugs sem aflýst væri með nægi­legum fyrir­vara. Því gæti Icelandair eftir þann tíma staðið frammi fyrir vali milli þess að halda flugi inni í áætlun og taka áhættuna á bóta­greiðslum eða aflýsa fyrir fram og fórna tekjunum. Elds­neytið enn stærri áhætta Þótt verk­falls­hættan sé brýn telur Akkur hækkandi flug­véla­elds­neytis­verð vera stærri áhættuþátt fyrir verðmat Icelandair. Verð á flug­véla­elds­neyti í Evrópu var komið í um 1.420 dali tonnið í byrjun septem­ber og Brent-olía hafði þá hækkað um 10% til viðbótar. Icelandair er að hluta varið fyrir hækkuninni til skamms tíma með elds­neytis­vörnum. Sam­kvæmt út­reikningum Akkurs er um 47% af elds­neytis­notkun síðari hluta ársins varið á um 684 dali tonnið. Varnirnar eru hins vegar mun minni fyrir árið 2027. Aðeins um 11% elds­neytis­notkunar næsta árs er tryggt með vörnum og því verður af­koman mun næmari fyrir verði á heims­markaði. Akkur áætlar að hver 100 dala hækkun á tonni um­fram þá verð­ferla sem þegar liggja til grund­vallar spám fyrir­tækisins geti lækkað EBITDA Icelandair árið 2027 um tæp­lega 30 milljónir dala. Sé elds­neytis­verðið til dæmis 1.350 dalir tonnið, í stað 1.200 dala, lækkar áætluð EBITDA ársins 2027 um 44 milljónir dala. Við 1.500 dali tonnið verður höggið 89 milljónir dala og við 1.650 dali 133 milljónir dala. Það er veru­legt í sam­hengi við að nýjasta EBITDA-spá Akkurs fyrir Icelandair árið 2027 hljóðar upp á 234 milljónir dala. Fleiri kjaramál í uppsiglingu Flugvirkjadeilan er ekki eina vinnumarkaðsáhættan sem Akkur fylgist með. Í greiningunni er sérstaklega bent á 15. september sem næsta mikilvæga dag vegna samningaviðræðna við flugmenn. Samkvæmt vinnuáætlun átti að stefna að endurnýjuðum kjarasamningi við þá fyrir þann tíma. Næstu dagar geta því ráðið miklu um skammtímahorfur Icelandair. Akkur segist ætla að endurskoða afkomuspár sínar annaðhvort þegar samkomulag næst við flugvirkja eða þegar fyrsti verkfallsdagurinn rennur upp og ljóst verður hversu stór hluti flugáætlunarinnar raskast. Þá verður jafnframt fylgst með nýjum upplýsingum um eldsneytisvarnir þegar Icelandair birtir uppgjör þriðja ársfjórðungs 22. október. Hækkunin á eldsneytisverði í september mun að stórum hluta koma fram í kostnaði félagsins í október vegna þess hvernig eldsneytiskostnaður er færður. Þrátt fyrir þessa áhættu heldur Akkur enn óbreyttu 1,67 króna verðmati á hlut Icelandair og kaupráðleggingu með merkingunni „áhættusöm“. Greiningarfyrirtækið segir skammtímaáhrifin neikvæð en telur fjárfestingarrökin að svo stöddu óbreytt.