Lántöku­kostnaður bandaríska ríkisins hefur ekki verið meiri í tæp tuttugu ár. Ávöxtunar­krafa á tíu ára bandarísk ríkis­skulda­bréf hækkaði um allt að 0,08 pró­sentu­stig á þriðju­dag og fór í 5,04%. Það er hæsta gildi frá júlí 2007. Krafan lækkaði síðar lítil­lega aftur og stóð í 5,01%. Tíu ára bandarísk ríkis­bréf eru meðal mikilvægustu viðmiða á alþjóð­legum skulda­bréfa­mörkuðum og hafa áhrif á fjár­magns­kostnað víða um heim. Krafan fór yfir 5% á mánu­dag í fyrsta sinn í tæp þrjú ár, en mikil sala hefur verið á skulda­bréfum eftir hækkun olíu­verðs vegna stríðsins við Íran. „Salan á skulda­bréfum hefur verið linnu­laus,“ segir Matt Amis, fjár­festingar­stjóri hjá Aber­deen Invest­ments, í sam­tali við Financial Times. Yfir 90% líkur á vaxta­hækkun At­hygli fjár­festa beinist nú að vaxtaákvörðun bandaríska seðla­bankans á mið­viku­dag Sam­kvæmt verðlagningu á fram­virkum mörkuðum telja fjár­festar meiri en 90% líkur á að Seðla­bankinn hækki stýri­vexti um 0,25 pró­sentu­stig. Slík ákvörðun myndi ganga gegn þrýstingi Donalds Trump Bandaríkja­for­seta, sem hefur kallað eftir lægri vöxtum og lægri fjár­magns­kostnaði. Hækkandi orku­verð hefur aukið áhyggjur af því að verðbólga haldist yfir mark­miði lengur en áður var talið. Brent-hráolía hækkaði um 0,8% á þriðju­dag og fór í 106,47 dali tunnan. Á sama tíma hafa fjár­festar í auknum mæli beint sjónum að skuldastöðu bandaríska ríkisins, en opin­berar skuldir Bandaríkjanna nema nú um 40 þúsund milljörðum dala. Jenny Zeng, fjár­festingar­stjóri skulda­bréfa hjá Alli­anz Global Investors, segir trúverðug­leika Seðla­bankans undir smá­sjá og fjár­festar muni fylgjast með því hvort Kevin Warsh seðla­banka­stjóri fylgi harðari orðræðu eftir með að­gerðum. Skulda­bréf lækka víða Söluþrýstingurinn er ekki bundinn við Bandaríkin. Ávöxtunar­krafa á tíu ára japönsk ríkis­skulda­bréf fór í 3,04% og hefur ekki verið hærri í þrjá ára­tugi. Markaðir verð­leggja nú um 80% líkur á að Japans­banki hækki stýri­vexti um 0,25 pró­sentu­stig í vikunni, í 1,25%, sem yrðu hæstu stýri­vextir þar í landi í 31 ár. Í Bret­landi fór ávöxtunar­krafa á tíu ára ríkis­skulda­bréf upp í 5,44% áður en hún lækkaði aftur í 5,39%. Hækkandi ávöxtunar­krafa ásamt mikilli skulda­bréfaút­gáfu ríkja hefur aukið áhyggjur af ört vaxandi vaxta­kostnaði. Sam­kvæmt Financial Times er ár­legur vaxta­kostnaður OECD-ríkja nú kominn yfir tvö þúsund milljarða dala, sem jafn­gildir um 3% af vergri lands­fram­leiðslu þeirra. Hækkandi krafa talin stærsta markaðsáhættan Óttinn við áfram­haldandi hækkun ávöxtunar­kröfu hefur jafn­framt aukist hratt meðal fjár­festa. Í nýjustu könnun Bank of America meðal sjóð­stjóra var „óstjórn­leg hækkun skulda­bréfa­vaxta“ nefnd stærsta áhættan á mörkuðum. Um þriðjungur svar­enda nefndi hana og fór hún þar með fram úr ótta við bólu í gervi­greindar­tengdum hluta­bréfum. Scott Bes­sent, fjár­málaráðherra Bandaríkjanna, reyndi í síðustu viku að róa markaðinn með sex milljarða dala endur­kaupaáætlun ríkis­skulda­bréfa. Að­gerðin virðist hingað til hafa haft tak­mörkuð áhrif og krafa á bæði tíu og þrjátíu ára ríkis­bréf hefur haldið áfram að hækka.