Scott Bes­sent, fjár­málaráðherra Bandaríkjanna, á í erfið­leikum með að ná tökum á bandaríska skulda­bréfa­markaðnum eftir að ávöxtunar­krafa ríkis­skulda­bréfa hækkaði enn frekar þrátt fyrir sér­staka upp­kaupaáætlun ríkis­sjóðs. Ávöxtunar­krafa tíu ára bandarískra ríkis­skulda­bréfa fór í 4,98% í við­skiptum í Asíu á föstu­dag, það hæsta í nær þrjú ár, áður en hún lækkaði lítil­lega í 4,94% í London. Fimm pró­senta markið er talið mikilvægt viðmið á Wall Street, enda hefur ávöxtunar­krafa tíu ára bréfa áhrif á verðlagningu fjölmargra lána og annarra fjár­eigna um allan heim. Hækkunin kemur þrátt fyrir að bandaríski ríkis­sjóðurinn hafi sett af stað sex milljarða dala upp­kaupaáætlun sem Bes­sent stækkaði frá upp­haf­legum áformum um að kaupa að minnsta kosti fjóra milljarða dala af skulda­bréfum. Ríkis­sjóðurinn tók þó aðeins til­boðum fyrir 5,2 milljarða dala í fyrstu að­gerðinni. Sam­kvæmt Financial Times töldu margir fjár­festar og bankar að um­fangið yrði mun meira og segja þeir að­gerðirnar of veikar til að stöðva hækkandi ávöxtunar­kröfu. „Of lítið til að leysa vandann“ Vincent Morti­er, fjár­festinga­stjóri Amundi, segir um­fang inn­gripsins ein­fald­lega ekki nægja til að takast á við þann vanda sem bandaríski skulda­bréfa­markaðurinn stendur frammi fyrir. Hann segir jafn­framt hættu á að að­gerðin sendi röng skila­boð til markaðarins þar sem hún geti gefið til kynna að stjórn­völd séu farin að sýna tauga­veiklun vegna þróunarinnar. Mark Ca­bana, yfir­maður bandarískrar vaxta­greiningar hjá Bank of America, segir að ríkis­sjóðurinn virðist hafa reynt að „gera þetta ódýrt“ í stað þess að sýna markaðnum að hann væri til­búinn að gera það sem þyrfti til að ná ákveðinni niður­stöðu. „Ef þú ætlar að grípa inn í þarftu að leggja meiri áherslu á að hreyfa markaðinn í ákveðna átt eða ná ákveðnu marki en hvað þú ert til­búinn að borga. Þú getur ekki haft þetta á báða bóga,“ segir Ca­bana. Bill Camp­bell, sjóð­stjóri hjá Dou­bleLine, tekur í sama streng og segir að fyrsta inn­gripið skipti mestu þegar stjórn­völd reyni að stýra markaði. „Ég hefði haldið að Bes­sent skildi að fyrsta skotið er það mikilvægasta og þá þarf að koma af krafti,“ segir hann. Óvenju­lega virk af­skipti ríkis­sjóðs Að­gerðir Bes­sent hafa vakið at­hygli vegna þess að bandarísk stjórn­völd hafa alla jafna ekki beitt svo beinum að­gerðum til að stýra skulda­bréfa- og gjald­eyris­mörkuðum. Ellen Zentner, aðal­hag­fræðingur Morgan Stanl­ey Wealth Mana­gement og meðlimur í ráðgjafar­nefnd bandaríska ríkis­sjóðsins um skulda­bréfaút­gáfu, segir að sumar að­gerðir stjórn­valda beri nú ein­kenni sem fremur séu tengd ný­markaðs­ríkjum. Hún bendir á að Bandaríkin hafi sjaldan gripið til beinna markaðsinn­gripa nema innan form­legs og stofnana­bundins ramma. Upp­kaupaáætlun ríkis­sjóðs kemur í kjölfar inn­grips Bandaríkjanna og Japans á gjald­eyris­markaði til að styðja jenið. Bes­sent hefur tekið mun virkari af­stöðu til markaða en flestir for­verar hans og sagði ný­lega við fjár­festa sem veðjuðu gegn jeninu: „Ég er húsið.“ En skulda­bréfa­markaðurinn virðist enn ekki hafa látið segjast. Ríkis­sjóður bendir á sterkt út­boð Bandaríski ríkis­sjóðurinn hafnar því þó að markaðurinn hafi misst trú á bandarískum ríkis­skulda­bréfum. Em­bættis­maður hjá ráðu­neytinu benti á mjög sterka eftir­spurn í út­boði á 30 ára ríkis­skulda­bréfum á fimmtu­dag. Aðal­miðlarar, stórir bankar sem þurfa að kaupa það sem aðrir fjár­festar taka ekki, fengu þar minnsta hlut sem mælst hefur í slíku út­boði. Hlut­fall til­boða á móti út­gefnu magni var jafn­framt það þriðja hæsta síðustu fimm ár. Það breytir þó ekki því að ávöxtunar­krafa tíu ára bréfa hefur hækkað um 0,16 pró­sentu­stig frá byrjun vikunnar og nálgast nú 5%. Fjár­festar segja því að vandinn sé stærri en sex milljarða dala upp­kaupaáætlun geti leyst. Undir liggja áhyggjur af verðbólgu, olíu­verði, sí­vaxandi skuldum ríkisins og þeirri spurningu hversu hátt ávöxtunar­krafa þurfi að fara áður en stjórn­völd grípa til enn stærri að­gerða.