Financial Times greinir frá því að Nicolai Tangemn sjóðstjóri norska olíusjóðsins hafi lagt til við norska fjár­málaráðu­neytið að vægi ríkis­skulda­bréfa í viðmiðunar­vísitölu skulda­bréfa­safnsins verði lækkað úr 70% í 50%. Sam­kvæmt út­reikningum FT gæti breytingin falið í sér um 106 milljarða dala sam­drátt í ríkis­skulda­bréfa­eign sjóðsins á heims­vísu, þar af um 80 milljarða dala í bandarískum ríkis­skulda­bréfum. Til­lagan kemur á sama tíma og áhyggjur hafa aukist af skuldastöðu ríkis­sjóða víða um heim og mikill söluþrýstingur hefur verið á skulda­bréfa­mörkuðum. Stríð Bandaríkjanna við Íran hefur jafn­framt aukið verðbólguótta og ýtt ávöxtunar­kröfu bandarískra ríkis­skulda­bréfa upp. Minna vægi ríkis­skulda­bréfa yrði sam­kvæmt til­lögunni að mestu bætt upp með kaupum á áhættu­samari skulda­bréfum, meðal annars veð­tryggðum skulda­bréfum í Bandaríkjunum. Stór hluti þeirra er þó tryggður af ríkis­tengdum stofnunum á borð við Fanni­e Mae, Freddi­e Mac og Ginni­e Mae og er láns­hæfi þeirra því nálægt því sem gerist með bandarísk ríkis­skulda­bréf. NBIM segir að 50% vægi ríkis­skulda­bréfa nægi til að mæta lausa­fjárþörf sjóðsins, jafn­vel á óróatímum, en að af­gangurinn geti gefið sjóðnum að­gang að fleiri áhættuálögum og þannig aukið mögu­lega ávöxtun. Til­lagan myndi sam­kvæmt FT lækka hlut bandarískra ríkis­skulda­bréfa í safninu um 12,2 pró­sentu­stig en á móti yrði vægi annarra bandarískra skulda­bréfa aukið um 11,4 pró­sentu­stig. Heildaráhætta sjóðsins gagn­vart Bandaríkja­dal myndi því lítið breytast. Sam­kvæmt NBIM myndi dollara­vægið aðeins lækka um 0,5 pró­sentu­stig. Þetta er eftir­tektar­vert í ljósi þess að Jens Stol­ten­berg fjár­málaráðherra sagði í apríl að engin áform væru uppi um að draga úr áhættu sjóðsins gagn­vart Bandaríkjunum, þrátt fyrir gagn­rýni sumra norskra þing­manna á mikla eignasöfnun þar. Til­lagan er enn aðeins ráðgjöf til fjár­málaráðu­neytisins og kemur til með­ferðar í stærra ferli. Sér­fræðiráð á að skila til­lögum fyrir janúar og ráðu­neytið mun síðan leggja loka­til­lögur fyrir norska þingið vorið 2027. Norski olíu­sjóðurinn er yfir 2.000 milljarðar dala að stærð og er einn stærsti fjár­festingar­sjóður heims. Rúm­lega fjórðungur eigna hans er nú í skulda­bréfum. Sjá einnig Söluþrýstingur á skulda­bréfa­mörkuðum magnast