Kortavelta Ís­lendinga hélt áfram að aukast í febrúar en vöxturinn byggðist ein­göngu á auknum út­gjöldum er­lendis. Korta­velta innan­lands dróst hins vegar saman milli ára sem gæti verið vís­bending um að hægt sé að fara á eftir­spurn heimilanna. Þetta kemur fram í nýrri greiningu Bergþóru Baldurs­dóttur, hag­fræðings hjá Ís­lands­banka, sem byggð er á ný­birtum gögnum Seðla­bankans. Sam­kvæmt greiningunni nam heildar­korta­velta lands­manna rúm­lega 119 milljörðum króna í febrúar. Það er 4,8 pró­senta aukning í krónum talið frá sama mánuði í fyrra. Að teknu til­liti til verðlags- og gengis­breytinga nemur raunaukningin hins vegar aðeins 1,2 pró­sentum, sem bendir til þess að tölu­vert hafi hægt á vextinum. Út­gjöld Ís­lendinga er­lendis halda áfram að drífa þróunina áfram. Korta­velta er­lendis jókst um 12 pró­sent að raun­virði á milli ára, á meðan korta­velta innan­lands dróst saman um 2 pró­sent. Sam­dráttur í inn­lendri korta­veltu hefur ekki sést síðan í ágúst á síðasta ári og þarf að leita aftur til haustsins 2024 til að finna sam­bæri­lega þróun. „Þrátt fyrir að kortavelta erlendis hafi vaxið að raunvirði eru utanlandsferðum Íslendinga að fækka samkvæmt gögnum Ferðamálastofu,“ segir í greiningu Bergþóru. Í greiningu Ís­lands­banka er þó varað við því að lesa of mikið í eina mánaðartölu, þar sem sveiflur geti verið tals­verðar. Samt sem áður kunni þróunin að vera merki um að hægt sé að draga úr neyslu heimilanna eftir mikinn vöxt á síðasta ári. Þrátt fyrir áfram­haldandi aukningu í korta­veltu er­lendis bendir annað til þess að ferðag­leði lands­manna sé að gefa eftir. Gögn Ferðamála­stofu sýna að utan­lands­ferðum Ís­lendinga fækkaði um 11 pró­sent í febrúar miðað við sama tíma í fyrra. Þá hefur ferðunum nú fækkað tvo mánuði í röð, eftir met­ár í utan­lands­ferðum í fyrra. Bergþóra bendir á að þar kunni ýmis­legt að spila inn í. Kólnun hag­kerfisins gæti verið farin að hafa áhrif en einnig sé mögu­legt að ferða­markaðurinn sé tíma­bundið mettaður eftir mikinn ferða­vilja lands­manna undir lok síðasta árs. Korta­velta er al­mennt talin gefa góða vís­bendingu um þróun einka­neyslu. Hún var einn helsti drif­kraftur hag­vaxtar í fyrra, þegar einka­neysla jókst um 4,3 pró­sent að raun­virði, sem var mesti vöxtur frá árinu 2022. Vöxturinn var sér­stak­lega mikill á loka­fjórðungi ársins, meðal annars vegna um­fangs­mikilla bif­reiða­kaupa fyrir áramót, þegar breytingar á vöru­gjöldum hvöttu heimili til að flýta kaupum. Að mati Ís­lands­banka bendir margt engu að síður til þess að heimilin standi al­mennt nokkuð vel. Upp­safnaður sparnaður og aukinn kaup­máttur hafi stutt við neyslu­getu þeirra undan­farin misseri. Miðað við nýjustu korta­veltutölur telur bankinn lík­legt að einka­neysla muni halda áfram að vaxa á fyrsta fjórðungi ársins, þó hægar en áður. Sú þróun sé í samræmi við þjóðhags­spá bankans frá því í janúar, þar sem gert er ráð fyrir að einka­neysla aukist um 2,4 pró­sent á þessu ári. Hægari vöxtur einka­neyslu, ásamt mót­vindi í út­flutnings­greinum, er sam­kvæmt greiningunni meðal helstu skýringa á því að út­lit sé fyrir minni hag­vöxt á þessu ári en í fyrra.