Korta­velta inn­lendra greiðslu­korta kólnaði veru­lega í apríl og gefur skýr merki um að einka­neysla sé að missa kraft. Inn­lend korta­velta heimila dróst saman um 8,6% að raun­virði í apríl frá sama mánuði í fyrra, að teknu til­liti til verðlags­breytinga. Er­lend korta­velta inn­lendra heimila dróst einnig saman, eða um 4,2% að raun­virði milli ára. Tölurnar óvenju veikar Sam­kvæmt markaðsaðilum sem hafa rýnt gögnin þarf að leita aftur til far­aldursáranna til að finna sam­bæri­lega kulda í korta­veltu. Seðla­banki Ís­lands birtir mánaðar­lega gögn um veltu greiðslu­korta og fjölda færslna inn­lendra korta innan­lands og er­lendis, auk veltu er­lendra korta hér á landi. Nýjustu tölur eru bráða­birgðatölur. Einn mánuður getur gefið villandi mynd, ekki síst þegar páskar færast milli mánaða og hafa áhrif á neyslu­mynstur. Þau áhrif kunna að bjaga apríltöluna að ein­hverju leyti. En jafn­vel þegar mars og apríl eru skoðaðir saman blasir við sama niður­staða: neyslan er að kólna hratt. Þetta er þriðja korta­veltu­talan í röð sem bendir til þess að það sé að hægja veru­lega á einka­neyslu. Það skiptir máli fyrir peninga­stefnuna, því einka­neysla hefur verið einn helsti drif­kraftur inn­lendrar eftir­spurnar síðustu ár. Veikari korta­velta styður því við það mat peninga­stefnu­nefndar Seðla­bankans í síðustu vaxtaákvörðun að „flestir hag­vísar“ beri nú vitni um hægari efna­hags­um­svif. Í korta­veltutölum síðustu mánaða hefur verið rætt um hvort breytingar á gjald­töku, meðal annars kíló­metra­gjald, kunni að hafa áhrif á ein­staka undir­liði eða saman­burð. En sam­drátturinn í apríl virðist of breiður og of mikill til að skýra hann með slíkum tækni­legum þáttum einum og sér. Þrýstir á vaxtaákvörðun Tölurnar koma á viðkvæmum tíma. Peninga­stefnu­nefnd Seðla­bankans til­kynnir vaxtaákvörðun á morgun og markaðurinn hefur að mestu búist við 0,25 pró­sentu­stiga hækkun stýri­vaxta. Ástæðan er þrálát verðbólga, hækkandi verðbólgu­væntingar og hækkandi verðbólguálag á skulda­bréfa­markaði. Þeir þættir hafa ýtt undir væntingar um að Seðla­bankinn þurfi að herða taum­haldið enn frekar. Köld korta­velta setur hins vegar flóknari mynd fyrir nefndina. Hún bendir til þess að vaxta­stigið sé þegar farið að bíta fastar í heimilin og að eftir­spurnin sé að gefa eftir. Ef nefndin hækkar vexti á morgun verður það því gert þrátt fyrir skýr merki um kólnandi neyslu. Ef hún heldur vöxtum óbreyttum gæti það komið markaði á óvart, enda hafa væntingar legið frekar í átt að hækkun.