Danskur upp­lýsingatækniráðgjafi, Anders Mus­sega­ard, greiddi nýverið upp húsnæðislán sitt eftir rúm 20 ár þótt hann hefði aldrei greitt niður höfuðstól þess með reglu­legum af­borgunum. Í staðinn var lánið með greiðslu­fresti á af­borgunum, þannig að hann greiddi fyrst og fremst vexti og kostnað en lagði féð sem annars hefði farið í af­borganir í hluta­bréf. Þegar eigna­safnið hafði hækkað nægi­lega mikið seldi hann hluta þess og greiddi lánið upp í einu lagi. Frá þessu er greint í Børsen, þar sem Mus­sega­ard lýsir 1. apríl sem sínum eigin „frelsis­degi“. Þá greiddi hann upp fast­eigna­lán sem hann tók árið 2003 þegar hann keypti sína fyrstu íbúð í Ár­ósum. Á þeim tíma voru af­borgunar­laus húsnæðislán ný af nálinni í Dan­mörku. Með slíkum lánum geta lántak­endur frestað af­borgunum á höfuðstól um ára­bil og þannig lækkað greiðslu­byrðina til skemmri tíma. Mus­sega­ard var meðal þeirra sem nýttu sér þetta fyrir­komu­lag snemma. Hann segist ekki hafa séð mikinn til­gang í því að greiða niður lánið jafnóðum, heldur fremur viljað halda húsnæðis­kostnaði í lág­marki og skapa meira svigrúm í eigin fjár­málum. Fjárfesti í hlutabréfum Apple árið 2013 Það svigrúm nýtti hann síðar til fjár­festinga. Mus­sega­ard hefur um ára­bil starfað sjálf­stætt sem upp­lýsingatækniráðgjafi og segir tekjurnar hafa verið sveiflu­kenndar. Þegar vel áraði hafi hann sett um­fram­fé til hliðar og hluti þess ratað á hluta­bréfa­markaðinn. Hann segist aldrei hafa fylgt fastri fjár­festingaáætlun eða reglu­legum mánaðar­sparnaði, heldur fjár­fest þegar honum þótti til­efni til. Á meðal fyrstu stærri fjár­festinga hans voru hluta­bréf í danska líftækni­fyrir­tækinu Gen­mab árið 2006. Hann keypti þá hluta­bréf fyrir 150 þúsund danskar krónur en skömmu síðar féll verð þeirra veru­lega. Hann segir það hafa reynt á þolin­mæðina en að sú fjár­festing hafi síðar reynst vel. Mestu skipti þó fjár­festing í App­le árið 2013. Mus­sega­ard segir að hann hafi þá lagt veru­legt fé í hluta­bréf tæknirisans. Sam­kvæmt um­fjöllun Børsen hefði fjár­festing upp á 500 þúsund danskar krónur í App­le árið 2013 í dag getað numið tæpum átta milljónum danskra króna. Hann vill ekki gefa upp nákvæma fjár­hæð eigin fjár­festingar en segist hafa séð gögn sem stað­festi hana. Loks kom að þeirri ákvörðun á síðasta ári að selja hluta eigna­safnsins og greiða upp lánið. Mus­sega­ard segir að þegar af­borgunar­lausa tíma­bilinu lauk hafi staðið til boða annaðhvort að hefja hefðbundnar af­borganir eða endur­fjár­magna lánið með til­heyrandi kostnaði. Sam­hliða því hafi aukin óvissa á mörkuðum orðið til þess að hann ákvað að nýta hluta­bréfa­eignina til að losa sig við skuldir. Þrátt fyrir að sagan hafi farið vel endaði hún ekki sem al­menn ráð­legging. Camilla Schjølin, hag­fræðingur hjá PFA, segir við Børsen að megin­reglan eigi áfram að vera sú að greiða niður húsnæðis­skuldir. Með því byggi fólk upp eigið fé sem auki fjár­hags­legt öryggi og mögu­leika síðar á ævinni. Hún segir þó að undan­tekningar geti átt við, einkum ef skuld­setning sé lág miðað við verðmæti eignar, viðkomandi hafi mikla fjár­festingar­reynslu, langan tíma­frest og mikla áhættusækni. Slík nálgun krefjist jafn­framt skýrrar stefnu og dreifingar fjár­festinga. Schjølin varar sér­stak­lega við því að fólk reyni að feta í sömu spor án þess að hafa bol­magn til að þola miklar sveiflur. Sagan sýni að hluta­bréf hafi oft skilað meiri ávöxtun en sem nemi láns­kostnaði, en engin trygging sé fyrir því að það endur­taki sig. Verði fjár­festar skelfingu lostnir í niður­sveiflu og selji á röngum tíma geti niður­staðan orðið þung. Mus­sega­ard viður­kennir sjálfur að leiðin hafi verið áhættusöm. Hann hafi þó talið sig hafa svigrúm til að taka slíka áhættu, enda ekki með stórt heimili, börn eða miklar skuld­bindingar. Þá hafi verðhækkun íbúðarinnar einnig veitt honum ákveðið öryggis­net. Til að greiða upp lánið þurfti hann þó að selja hluta af App­le-hluta­bréfum sínum, sem hann segir hafa reynst sér erfitt. „Það er næstum eins og að gefa frá sér börnin sín,“ segir hann við Børsen.