Rekstur Kópa­vogs­bæjar var jákvæður um 4,6 milljarða króna á síðasta ári og segir Ás­dís Kristjáns­dóttir bæjar­stjóri að árin 2024 og 2025 séu tvö bestu rekstrarár sveitarfélagsins í 18 ár. Þetta kemur fram í árs­reikningi Kópa­vogs­bæjar fyrir árið 2025, sem lagður var fram í bæjarráði í morgun. Rekstrarniður­staða A-hluta bæjarins var jákvæð um 4,2 milljarða króna, þótt fjár­hagsáætlun hefði aðeins gert ráð fyrir um 263 milljóna króna af­gangi. Rekstrarniður­staða A- og B-hluta var jafn­framt jákvæð um 4,6 milljarða króna, saman­borið við áætlaðan 366 milljóna króna af­gang. Í til­kynningu bæjarins segir að veltu­fé frá rekstri hafi numið 4,8 milljörðum króna á sam­stæðunni, sem hafi skapað svigrúm til að standa undir bæði fram­kvæmdum og af­borgunum lána. Á sama tíma hafi heildar­skuldir og skuld­bindingar lækkað að raun­virði og skulda­viðmið sam­stæðunnar farið niður í 72 pró­sent úr 77 pró­sentum. Það er vel undir lög­bundnu há­marki sveitarfélaga sem er 150 pró­sent. „Árin 2024 og 2025 eru tvö bestu rekstrarár Kópa­vogs í 18 ár,“ segir Ás­dís Kristjáns­dóttir bæjar­stjóri. Hún segir sterka stöðu bæjarins vera af­rakstur mark­vissrar for­gangs­röðunar og ábyrgra ákvarðana í rekstri sveitarfélagsins. Í til­kynningunni er bent á að tekjur af lóðaút­hlutunum í öðrum og þriðja áfanga Vatns­enda­hvarfs hafi haft áhrif á niður­stöðuna, en slíkar tekjur eru sam­kvæmt venju ekki færðar inn í fjár­hagsáætlun. Þá kemur fram að ekki hafi verið þörf á lántökum á árinu 2025, meðal annars vegna þessara tekna. Sam­hliða jákvæðri af­komu réðst Kópa­vogs­bær í um­fangs­miklar fjár­festingar. Fram­kvæmdir í leik- og grunnskólum og öðrum mann­virkjum námu alls um 7,7 milljörðum króna á árinu. Stærsta ein­staka fram­kvæmdin var bygging við Barna­skóla Kárs­ness við Skóla­gerði, en þar nam kostnaður um 3 milljörðum króna og tók skólinn til starfa haustið 2025. Auk þess var um 1,7 milljörðum króna varið í fram­kvæmdir og endur­bætur við leik- og grunnskóla, meðal annars vegna nýs leikskóla við Skólatröð. Þá var ráðist í fleiri stór verk­efni, svo sem byggingu íbúða­kjarna við Kleifa­kór, fram­kvæmdir við Kópa­vogs­völl, Fífuna og Kórinn, auk fjár­festinga í nýju hjúkrunar­heimili í Boðaþingi og gatna­gerð í Vatns­enda­hvarfi. Vaxta­berandi skuldir sam­stæðu Kópa­vogs­bæjar námu rúm­lega 36 milljörðum króna í árs­lok 2025 en heildar­skuldir og skuld­bindingar námu 58 milljörðum króna. Eigið fé A- og B-hluta nam 50 milljörðum króna í árs­lok, þar af 26 milljörðum króna í A-hluta. Laun og launa­tengd gjöld A- og B-hluta, að frá­dregnu fram­lagi til líf­eyris­skuld­bindinga, námu alls 30 milljörðum króna á árinu og hækkuðu um 5,7 pró­sent milli ára. Á sama tíma hækkaði gjald­færsla líf­eyris­skuld­bindinga veru­lega og fór úr 600 milljónum króna árið 2024 í 2,1 milljarð króna árið 2025. Launa­kostnaður vegur nú um helming af rekstrar­tekjum sam­stæðunnar. Ás­dís segir bæinn jafn­framt hafa lagt áherslu á að verja stöðu heimilanna. Hún bendir á að fast­eigna­gjöld hafi lækkað að raun­virði undan­farin ár og séu nú þau lægstu á höfuð­borgar­svæðinu. Þá hafi Kópa­vogs­bær nýverið ákveðið að tak­marka gjald­skrár­hækkanir fyrir barna­fjöl­skyldur við 2,5 pró­sent. Íbúar Kópa­vogs­bæjar voru 41.630 í byrjun desember í fyrra og fjölgaði þeim um 279 á milli ára, eða um 0,67 pró­sent.