Norska skattanefndin leggur til umfangsmiklar breytingar á skattkerfinu. Eignaskattur verði lækkaður verulega, skattar á laun og atvinnurekstur lækkaðir og stofn virðisaukaskatts breikkaður. Á móti eru lagðar til skattahækkanir á öðrum sviðum, meðal annars vegna frístundahúsa, hækkun lægsta þreps virðisaukaskatts og afnám rafbílaívilnana. Nefndin skilaði skýrslu sinni í morgun til Jens Stoltenbergs fjármálaráðherra en fulltrúar allra þingflokka sátu í nefndinni utan Framfaraflokksins, sem nú fer með himinskautum í skoðunarkönnunum. Sjá einnig Flótti frá Noregi eftir skattahækkanir Støre-stjórnarinnar Nefndin var sett á stofn af ríkisstjórn Verkamannaflokks Jonas Gahr Støre til að leggja grunn að breiðu samkomulagi þvert á flokka í Stórþinginu. Henni var falið að móta tillögur að heildstæðum skattaumbótum sem stuðli að samkeppnishæfu skattkerfi fyrir norskt atvinnulíf og geti notið stuðnings til lengri tíma. Gert er ráð fyrir að breytingarnar taki gildi á næsta ári. Skipun nefndarinnar er svar við harðri gagnrýni á stórhækkaðan eignaskatt í Noregi. Skatturinn skilar nú tvöfalt meiri tekjum en þegar ríkisstjórn Støre tók við árið 2021. Gagnrýnin hefur einnig magnast vegna brottflutnings eignamanna, einkum til Sviss, og minnkandi fylgis Verkamannaflokksins. Í Frjálsri verslun, sem kom út í síðustu viku, er fjallað ítarlega um hækkun eignaskatts og fjármagnstekjuskatts í Noregi og áhrif þeirra. Í Viðskiptablaðinu í morgun er fjallað um mikla fylgisaukningu norska Framfaraflokksins, minnkandi fylgi Verkamannaflokksins og Stoltenberg-áhrifin á fylgi flokksins. Sjá einnig Fram­fara­flokkurinn orðinn stærstur og Støre í vörn Stærsta breytingin sem nefndin leggur til snýr að eignaskattinum. Nefndin vill fella niður alla frádrætti vegna verðmats eigna og meta eignir almennt að fullu. Á móti verði skatthlutföll lækkuð úr 1% og 1,1% í eitt hlutfall á bilinu 0,25% til 0,75%. Almennur grunnfrádráttur hækki úr 1,9 milljónum í 2,0 milljónir norskra króna og sérstakur frádráttur verði tekinn upp fyrir aðalíbúð. Tekjutap ríkissjóðs er metið á 6,3 til 25,2 milljarða norskra króna, eftir því hvaða hlutfall verður valið. Tillögurnar fela þó einnig í sér skattahækkanir. Skattfrelsi við sölu frístundahúsa yrði afnumið og 70 prósenta matsafsláttur vegna sumarbústaða felldur niður. Það gæti hækkað skatt á slíkar eignir verulega. Umdeildasti hluti málsins snýr að brottflutningsskatti. Meirihluti nefndarinnar vill halda tólf ára reglunni, sem felur í sér að skattur á óinnleystan hagnað sem myndast hefur í Noregi skuli greiddur eigi síðar en tólf árum eftir brottflutning, óháð því hvort eignirnar hafi verið seldar. Þrír nefndarmenn skiluðu séráliti og vilja afnema regluna. Nefndin leggur þó til tilslakanir í kerfinu. Afborgunarhlutfall vegna arðgreiðslna lækki úr 70% í 37,84% og undanþága verði tekin upp fyrir einstaklinga sem dvelja tímabundið í Noregi. Þá leggur nefndin til að lægsta þrep virðisaukaskatts hækki úr 12% í 15%, að skoðað verði að leggja virðisaukaskatt á meðal annars íþróttir, tryggingar og skammtímaleigu og að rafbílaívilnanir verði afnumdar í áföngum. Tekjuskattur á hlutafélög verði áfram 22%. Nefndinni stýrði Eigil Knutsen. Aðrir nefndarmenn þegar skýrslunni var skilað voru Lars Erik Bartnes, Joachim Meidell Bjerke, Ingrid Nergaard Fjeldstad, Ole-Andreas Elvik Næss, Jon Gunnar Pedersen, Ragnhild Camilla Schreiner, Hans Olav Syversen, Hilde Thorstad, Torkil Vederhus og Camilla Bakken Øvald. Astrid Hauge Rambøl var upphaflega skipuð í nefndina en vék úr henni 17. júní 2026, áður en skýrslan var fullgerð.