Þegar Jonas Gahr Støre, leiðtogi Verkamannaflokksins , tók við embætti forsætisráðherra Noregs haustið 2021 virtist nýtt tímabil vera að hefjast í norskum stjórnmálum. Eftir átta ára stjórnartíð borgaralegra ríkisstjórna undir forystu Ernu Solberg höfðu vinstrið og miðjan náð aftur meirihluta á Stórþinginu. Rauðgrænu flokkarnir höfðu þá 100 af 169 þingsætum. Verkamannaflokkurinn og Miðflokkurinn mynduðu ríkisstjórn en nutu jafnframt stuðnings annarra vinstri flokka á þingi. Þótt Sósíalíski vinstriflokkurinn hafnaði þátttöku í ríkisstjórn gat Støre yfirleitt reitt sig á stuðning hans við stærstu mál ríkisstjórnarinnar, þar á meðal fjárlög. Staðan var því sterk og Støre hafði pólitískt svigrúm til að marka nýja stefnu. Fáir hefðu þá spáð því að innan fárra ára yrði ríkisstjórnin komin í svo mikla vörn að Framfaraflokkurinn myndi mælast lang stærstur í könnunum. Samstarfið við Miðflokkinn reynist erfitt Þótt Verkamannaflokkurinn og Miðflokkurinn hafi sameinast um að binda enda á stjórnartíð borgaralegu flokkanna var samstarfið aldrei sjálfgefið. Verkamannaflokkurinn er hefðbundinn sósíaldemókratískur stjórnarflokkur en Miðflokkurinn byggir fylgi sitt á landsbyggðarmálum og tortryggni gagnvart auknum áhrifum Evrópusambandsins á norska stefnumótun. Ágreiningur kom reglulega upp um orkumál, loftslagsmál og samskipti Noregs við Evrópusambandið í gegnum EES-samninginn. Deilurnar náðu hámarki í byrjun árs 2025 þegar Miðflokkurinn hafnaði innleiðingu þriggja tilskipana úr fjórða orkupakka Evrópusambandsins. Flokkurinn taldi þær færa of mikið vald úr landi. Miðflokkurinn yfirgaf ríkisstjórnina 30. janúar 2025. Þar með missti Støre stærsta samstarfsflokk sinn og sat eftir með eins flokks minnihlutastjórn Verkamannaflokksins. Fáeinum dögum síðar tók Jens Stoltenberg við af Trygve Slagsvold Vedum sem fjármálaráðherra. Það var upphafið að nýju tímabili þar sem ríkisstjórnin þurfti stöðugt að sækja meirihluta út fyrir eigin raðir. Meirihlutinn hélt en staða Støre veiktist Þrátt fyrir stjórnarslitin héldu rauðgrænu flokkarnir meirihluta sínum í þingkosningunum 8. september 2025. Verkamannaflokkurinn, Miðflokkurinn, Sósíalíski vinstriflokkurinn, Rauði flokkurinn og Græningjar fengu samanlagt 88 af 169 þingsætum og tryggðu þannig Støre áframhaldandi setu í forsætisráðuneytinu. Verkamannaflokkurinn fékk 53 þingsæti, en Framfaraflokkurinn varð næststærstur með 47 sæti, sem var besta útkoma í sögu flokksins, og hægriflokkurinn Høyre varð þriðji stærsti flokkurinn með 24 þingsæti. Verkamannaflokkurinn situr einn í stjórn og þarf að leita stuðnings annarra rauðgrænna flokka frá máli til máls til að ná meirihluta. Jonas Gahr Støre, forsætisráðherra Noregs og leiðtogi Verkamannaflokksins. © epa (epa) Nánar er fjallað um málið í Viðskiptablaðinu . Áskrifendur geta lesið fréttina í heild hér .