Þegar Jonas Gahr Støre, leiðtogi Verkamannaflokksins , tók við embætti forsætisráðherra Noregs haustið 2021 virtist nýtt tímabil vera að hefjast í norskum stjórnmálum. Eftir átta ára stjórnartíð borgaralegra ríkisstjórna undir forystu Ernu Solberg höfðu vinstrið og miðjan náð aftur meirihluta á Stórþinginu. Rauðgrænu flokkarnir höfðu þá 100 af 169 þingsætum. Verkamannaflokkurinn og Miðflokkurinn mynduðu ríkisstjórn en nutu jafnframt stuðnings annarra vinstri flokka á þingi. Þótt Sósíalíski vinstriflokkurinn hafnaði þátttöku í ríkisstjórn gat Støre yfirleitt reitt sig á stuðning hans við stærstu mál ríkisstjórnarinnar, þar á meðal fjárlög. Staðan var því sterk og Støre hafði pólitískt svigrúm til að marka nýja stefnu. Fáir hefðu þá spáð því að innan fárra ára yrði ríkisstjórnin komin í svo mikla vörn að Framfaraflokkurinn myndi mælast lang stærstur í könnunum. Þrátt fyrir stjórnarslitin héldu rauðgrænu flokkarnir meirihluta sínum í þingkosningunum 8. september 2025. Verkamannaflokkurinn, Miðflokkurinn, Sósíalíski vinstriflokkurinn, Rauði flokkurinn og Græningjar fengu samanlagt 88 af 169 þingsætum og tryggðu þannig Støre áframhaldandi setu í forsætisráðuneytinu. Verkamannaflokkurinn fékk 53 þingsæti, en Framfaraflokkurinn varð næststærstur með 47 sæti, sem var besta útkoma í sögu flokksins, og hægriflokkurinn Høyre varð þriðji stærsti flokkurinn með 24 þingsæti. Verkamannaflokkurinn situr einn í stjórn og þarf að leita stuðnings annarra rauðgrænna flokka frá máli til máls til að ná meirihluta. Veik staða ríkisstjórnarinnar hefur ekki skilað Hægriflokknum þeirri fylgisaukningu sem margir hefðu búist við. Eftir kosningaósigurinn 2025 lét Erna Solberg af formennsku eftir 22 ár í forystu flokksins. Á landsfundi 14. febrúar 2026 tók Ine Eriksen Søreide, fyrrverandi utanríkisráðherra, við stjórnartaumunum. Søreide nýtur virðingar innan flokksins og hefur mikla reynslu úr stjórnmálum. Hún tók hins vegar við á tíma þegar umræðan snýst fyrst og fremst um skattamál, framfærslukostnað og efnahagsmál. Þar hefur Sylvi Listhaug náð sterkari tengingu við óánægða kjósendur, og hefur Framfaraflokkurinn mælst með um og yfir 30% fylgi á síðustu mánuðum, tvöfalt á við Hægriflokkinn. Hægriflokkurinn virðist því vera í ákveðnu millibilsástandi. Flokkurinn var lengi augljósi valkosturinn við Verkamannaflokkinn. Nú er staðan önnur. Margir kjósendur sem vilja breytingar fara ekki til Hægriflokksins heldur beint til Framfaraflokksins. Nánar er fjallað um málið í Viðskiptablaðinu . Áskrifendur geta lesið fréttina í heild hér .