Huw Pill, aðalhagfræðingur Seðlabanka Englands, varar við því að stjórnvöld og markaðsaðilar verði of værukærir gagnvart verðbólgu þótt hún hafi lækkað verulega síðustu ár. Hann telur að verðbólga upp á um 3 prósent sé enn of há og að hún verði að færast aftur að 2 prósenta markmiði bankans. Verðbólga í Bretlandi fór hæst í 11,1% í október 2022, sem var hæsta verðbólga í landinu í 41 ár. Helstu ástæður voru gríðarlegar hækkanir á orkuverði í kjölfar innrásar Rússlands í Úkraínu, auk mikilla hækkana á matvælum og samgöngukostnaði. Pill hefur á síðustu tveimur fundum peningastefnunefndar bankans greitt atkvæði með hækkun vaxta. Áhyggjur hans beinast meðal annars að því að hækkandi olíu- og gasverð, sem rekja má til átaka í Miðausturlöndum fyrr á árinu, geti aukið verðbólguþrýsting á ný. „Vegna þess að verðbólgan fór einu sinni upp í 11 prósent óttast ég að nú telji menn að 3 prósenta verðbólga sé ásættanleg. Það er ekki raunin,“ sagði Pill í viðtali við bresku fréttastofuna Press Association. Verðbólga mældist 2,8 prósent í Bretlandi í apríl en markmið Seðlabanka Englands er að hún verði 2 prósent. Pill segir að áður hefði verðbólga, sem væri einu prósentustigi yfir markmiði, verið talin alvarlegt áhyggjuefni og svo ætti enn að vera. Hann telur einnig að peningastefnan hafi ekki verið nægilega aðhaldssöm undanfarin ár og að vaxtalækkanir hafi hugsanlega komið of snemma. Stýrivextir hafa lækkað úr 5,25 prósentum sumarið 2024 niður í 3,75 prósent. Vextirnir hafa verið óbreyttir síðustu sex mánuði. Meirihluti peningastefnunefndarinnar, undir forystu bankastjórans Andrews Bailey, hefur kosið að halda vöxtum óbreyttum. Bailey hefur bent á að hærra orkuverð hafi þegar skapað verðbólguþrýsting í hagkerfinu, þótt olíuverð hafi lækkað á ný eftir vopnahlé Bandaríkjanna og Írans. Flestir hagfræðingar gera nú ráð fyrir að stýrivextir haldist óbreyttir það sem eftir lifir árs, þótt sumir markaðsaðilar telji enn mögulegt að þeir verði hækkaðir fyrir árslok.