Í nýju tímariti Frjálsrar verslunar er að finna ítarlegt viðtal við Frey Þormóðsson, fjármálastjóra og stjórnarformann Exploration Laboratories (ExLabs) um starfsemi bandaríska geimrannsóknafyrirtækisins sem hyggst rannsaka loftsteina. Langtímamarkmið ExLabs er hefja námugröft úti í geimi. Freyr segir að þetta verði mögulega ekki að raunveruleika fyrr en eftir 30-50 ár en bætir við að tækifærin séu gríðarleg. Hann bendir á að SpaceX hafi í skráningarlýsingu vegna frumútboðs félagsins greint frá því að fyrirtækið stefni að námugrefti á loftsteinum. Þetta sé enn eitt merkið um að geimiðnaðurinn sé farinn að hugsa alvarlega um námugröft. ExLabs undirbýr nú að senda sitt fyrsta geimfar út í geim á árinu 2028 með það að markmiði að greina loftsteininn Apophis sem mun fljúga rétt framhjá jörðu þann 13. apríl 2029. Talið er að Apophis-loftsteininn sé m.a. gerður úr nikkeli og járni og aðrir loftsteinar sem fara framhjá jörðu gætu innihaldið verðmæta málma á borð við liþíum, kóbalt, gallín, platínu og króm, sem eru allt eftirsóttir, sjaldgæfir og verðmætir málmar á jörðu. „Á loftsteinum sem ferðast framhjá jörðu á reglulegu millibili er milljónfalt magn af þessum verðmætustu efnum, samanborið við jörðu. Við höfum tæknina til að byrja að ná þessum efnum og koma þeim til jarðar og jafnframt nýta þá úti í geimi. Þetta hefði þau áhrif að við þyrftum ekki að keppast um þessi hráefni og gætum dregið úr eða jafnvel hætt námugrefti á jörðu. Þetta myndi því hafa jákvæð umhverfisáhrif og draga úr spennu í alþjóðastjórnmálum,“ segir Freyr. Á myndinni má sjá líkan af geimfari sem er hannað til að elta niður lofstein. © Aðsend mynd (AÐSEND) Í dag sé kostnaður við námugröft fyrir hvert kíló úti í geimi milljónfaldur í samanburði við hefðbundin námugröft á jörðu. Freyr segir að þessi kostnaður muni falla hratt, allt eins og kostnaður við lyftingu kílós frá jörðu og til þess að nefna annað dæmi; fallandi framleiðslukostnaður örgjörva. Einhvers staðar þurfi að byrja og að horft sé til þess að með fjárfestingu og tækniframförum muni munurinn dragast verulega saman á næstu áratugum. „Þetta snýst hins vegar ekki bara um kostnað og verðmæti, heldur einnig um magn og markaðsþörf. Við vitum að á endanum verðum við að fara og ná í þessi efni úti í geimi af því að að lokum verður ekki nægilega mikið eftir á jörðu.“ Fréttin er hluti af ítarlegu viðtali við Frey í tímariti Frjálsrar verslunar . Áskrifendur geta lesið greinina í heild sinni hér . Hægt er að kaupa ritið hér .