Sigur­björn Þor­kels­son tekur við stjórnar­for­mennsku hjá Amaroq Minerals þegar hluta­bréf félagsins verða tekin til við­skipta á aðal­markaði Kaup­hallarinnar í London. Þetta kemur fram í til­kynningu frá félaginu. Graham Stewart, sem hefur verið stjórnar­for­maður Amaroq síðustu sjö ár, lætur þá af for­mennsku en verður áfram í stjórn félagsins sem óháður stjórnar­maður. Félagið segir það tryggja sam­fellu og áfram­haldandi aðkomu hans að stefnumótun og þróun Amaroq. Breytingarnar taka gildi þegar hluta­bréf Amaroq verða tekin til við­skipta á aðal­markaði London Stock Exchange og í svo­kölluðum ESCC-flokki breska fjár­mála­eftir­litsins. Félagið gerir ráð fyrir að það gerist ekki fyrr en í fyrsta lagi 31. júlí. Sigur­björn Þor­kels­son tekur við stjórnar­for­mennsku hjá Amaroq. Minerals Amaroq er nú skráð á AIM-markaðinn í London, Nas­daq Iceland og OTCQX-markaðinn í Bandaríkjunum. Flutningur á aðal­markað í London hefur verið hluti af áformum félagsins um að styrkja stöðu sína gagn­vart alþjóð­legum fjár­festum. Þrír nýir stjórnar­menn Sam­hliða breytingunum bætast þrír nýir óháðir stjórnar­menn við stjórn Amaroq. Það eru Annette Brønd­holt, Jorunn Johanne Sætre og Teitur Poul­sen. Sætre verður jafn­framt svo­kallaður seni­or in­dependent director, eða helsti óháði stjórnar­maður félagsins. David Neu­hauser, sem hefur verið í stjórn Amaroq frá júní 2021, lætur af stjórnar­setu frá og með 21. júlí. Hann var ekki óháður stjórnar­maður. Í til­kynningu Amaroq kemur fram að félagið geri ráð fyrir að Neu­hauser muni áfram styðja félagið og dóttur­félög þess sem ráðgjafi. Stewart segir í til­kynningunni að nýju stjórnar­mennirnir bæti við víðtækri reynslu af námu­vinnslu, fjár­málum, orku, stjórnar­háttum og alþjóð­legum rekstri. Sú reynsla muni nýtast félaginu þegar það færist á aðal­markað Kaup­hallarinnar í London og heldur áfram að vinna að upp­byggingu sinni á Græn­landi. Hann þakkar jafn­framt Neu­hauser fyrir störf hans í þágu félagsins og segir stuðning hans hafa verið einn af horn­steinum þess sem Amaroq sé orðið í dag. „Ég er einnig mjög ánægður með að til­kynna að Siggi taki við af mér sem stjórnar­for­maður þegar félagið færist á aðal­markað Kaup­hallarinnar í London. Eftir sjö ár sem stjórnar­for­maður er rétti tíminn kominn til að stíga til hliðar og ég hlakka til að starfa áfram fyrir félagið sem stjórnar­maður,“ segir Stewart. Mikilvægt skeið í þróun félagsins Sigur­björn Þor­kels­son segir það heiður að taka við stjórnar­for­mennsku á svo mikilvægu skeiði í þróun Amaroq. „Graham hefur veitt félaginu framúr­skarandi for­ystu og sýnt mikla skuld­bindingu sem stjórnar­for­maður. Hann hefur átt stóran þátt í að byggja upp sterkan grunn og skýra stefnu félagsins,“ segir Sigur­björn í til­kynningu. Hann segist hlakka til að starfa með nýjum stjórnar­mönnum, stjórninni í heild og stjórn­endum félagsins við að styðja áfram­haldandi vöxt og áform Amaroq á Græn­landi. Annette Brønd­holt hefur meira en 25 ára reynslu af alþjóð­legri stjórnun, meðal annars í flugi, ferðaþjónustu, tísku, tækni og fjár­festingum. Hún hefur gegnt stjórn­endastöðum hjá SAS og By Malene Birger og sinnt stjórnar­for­mennsku og stjórnar­störfum hjá skráðum félögum, einka­fyrir­tækjum, fjöl­skyldu­fyrir­tækjum og opin­berum aðilum. Jorunn Johanne Sætre hefur meira en 40 ára reynslu úr orku­geiranum. Hún starfaði lengi hjá Halli­burton, meðal annars sem fram­kvæmda­stjóri félagsins á Norður­löndum og í stjórn­endastöðum í Bandaríkjunum. Hún hefur einnig setið í stjórnum skráðra og óskráðra félaga, meðal annars Long­boat Ener­gy og Faroe Petroleum, auk þess að hafa setið í full­trúaráði Norsk Hydro. Teitur Poul­sen hefur meira en 20 ára reynslu af námu­vinnslu, orku, fyrir­tækja­fjár­mögnun, stefnumótun, sam­runum og yfir­tökum og fjár­magns­mörkuðum. Hann er nú fjár­mála­stjóri Lundin Mining Cor­por­ation. Áður var hann fjár­mála­stjóri Lundin Ener­gy og þar áður fjár­mála­stjóri Aker BP. Amaroq vinnur að leit, þróun og upp­byggingu gull- og málm­verk­efna á Suður-Græn­landi. Helsta eign félagsins er Nalunaq-gullnáman, en félagið á einnig eigna­safn gull- og málm­verk­efna á svæðinu, meðal annars tengt kopar, nikkel, sjald­gæfum jarðefnum og öðrum stefnu­markandi málmum.