Reykja­vík Geot­herma­l hefur lokið fjár­mögnunar­lotu að upp­hæð allt að 20 milljónum dala, sem jafn­gildir um 2,5 milljörðum króna. Fjár­mögnunin var leidd af Inn­viðum fjár­festingum II slhf., inn­viða­sjóði í stýringu hjá Summu rekstrarfélagi hf., og tóku jafn­framt núverandi hlut­hafar þátt. Að sögn Morgun­blaðsins standa viðræður enn yfir við meðfjár­festa um þátt­töku í lotunni. Að svo stöddu liggur ekki fyrir hversu stór eignar­hlutur fjár­festanna verður eftir við­skiptin en fjár­magnið á að nýtast til að efla starf­semi og styðja við vöxt félagsins. Fjár­mögnunin er sögð fyrsti áfangi í stærri áætlun, en sam­kvæmt Morgun­blaðinu gerir Reykja­vík Geot­herma­l ráð fyrir að heildar­um­fang fjár­festinga í verk­efnum sem nú eru í þróun nemi að minnsta kosti 80 milljörðum króna á næstu fjórum árum, að mestu leyti á Ís­landi. Undir­búningur að næstu fjár­mögnunar­lotu er þegar hafinn. Stærsta verk­efnið í Ölfusi Magnús Dagur Ás­björns­son, for­stjóri Reykja­vík Geot­herma­l og einn stofn­enda félagsins, segir við Morgun­blaðið að stærsta verk­efni fyrir­tækisins um þessar mundir sé þróun Bolaöldu­verk­efnisins í Ölfusi. Félagið er jafn­framt með þrjú rannsóknar­leyfi á Ís­landi og vinnur mark­visst að frekari þróun orku­verk­efna innan­lands. Magnús segir að aðkoma Summu og ís­lenskra líf­eyris­sjóða nýtist vel í upp­byggingu innan­lands­verk­efna. Hann út­skýrir jafn­framt að á Ís­landi sé verk­efnið byggt upp af félaginu sjálfu en er­lendis hafi Reykja­vík Geot­herma­l oft starfað í sam­starfi við aðra fjár­festa. Fjölgun starfa fram undan Greini­legt er að upp­bygging Bolaöldu­verk­efnisins muni kalla á fjölgun starfs­fólks og Reykja­vík Geot­herma­l hefur þegar aug­lýst eftir sér­fræðingum í fjöl­breytt störf. Magnús gefur ekki upp hversu mörg stöðu­gildi muni bætast við en segir ljóst að vinnustaðurinn muni stækka mikið á næstu misserum. Hann telur að jarðvarmi eigi mikið inni á heims­vísu og að áhugi bæði stjórn­valda og einka­aðila fari vaxandi. Að hans mati aukist eftir­spurn eftir „grænu grunnafli“ eftir því sem vindorka og sólar­orka vaxi sem hluti orku­kerfa og þar geti jarðhitinn gegnt lykil­hlut­verki. Magnús segir að í þeirri alþjóð­legu veg­ferð skipti máli að félagið byggi á sterkum grunni á heima­markaði — og aðkoma Summu og líf­eyris­sjóðanna tryggi ein­mitt það.