Kínverska hlutabréfavísitalan CSI 300 lækkaði um 1,1% í morgun og hefur nú lækkað um 8,6% í júlí. Það er mesta lækkun vísitölunnar innan mánaðar frá því í janúar 2016, að því er segir í frétt Financial Times . Hlutabréfaverð kínverskra tæknifyrirtækja lækkaði talsvert í morgun, sem rakið er til lækkunar á heimsvísu á gengi birgja gervigreindarfyrirtækja. CSI AI vísitalan lækkaði um 5,8% í morgun. Samanlagt markaðsvirði Innolight, Eoptolink og Cambricon Technologies - þriggja af leiðandi gervigreindarfyrirtækjunum í Kína – lækkaði samtals um 34 milljarða dala í morgun. Þar af lækkaði gengi Innolight um 9% á öðrum viðskiptadeginum í kjölfar þess að hlutabréf félagsins voru tvískráð. Lækkunin fylgir í kjölfar þess að stóru bandarísku tæknifyrirtækin birtu uppgjör sem voru undir spám greiningaraðila, sem hefur dregið úr bjartsýni varðandi vöxt í tæknigeiranum. Jafnframt hafa áhyggjur um umfangsmiklar fjárfestingar þeirra í gervigreindartækni aukist. Sjá einnig Kína kaupir hlutabréf fyrir níu milljarða dala Talsverðar lækkanir hafa verið á öðrum asískum hlutabréfamörkuðum undanfarnar vikur. Þannig hefur kóreska Kospi-vísitalan lækkað um nærri 40% frá miðjum júní, en fram að því hafði vísitalan tvöfaldast frá áramótum.