Eins og Við­skipta­blaðið greindi frá í síðustu viku hefðu gjald­eyris­varðar er­lendar stöður skilað meiri upp­safnaðri ávöxtun en óvarðar stöður frá árs­byrjun 2020, sam­kvæmt greiningu Kviku banka. Árangurinn ræðst þó mjög af tíma­bili, vaxta­mun og gengisþróun krónunnar. Skýrasti ávinningurinn kom fram í er­lendum skulda­bréfum, þar sem gjald­eyris­varnir hefðu dregið veru­lega úr sveiflum. Skulda­bréf sveiflast að jafnaði minna í verði en hluta­bréf. Þegar ávöxtun þeirra er um­reiknuð í krónur geta gengis­sveiflur því orðið stór hluti heildar­sveiflunnar. Í hluta­bréfum ræður verðþróun fyrir­tækjanna sjálfra mun meiru. Gengis­sveiflur vega þar hlut­falls­lega minna og því hafa gjald­eyris­varnir al­mennt minni áhrif. Sam­kvæmt út­reikningum Kviku hefði full gjald­eyris­vörn lækkað flökt bandarískrar skulda­bréfa­vísitölu um 43,4% frá árs­byrjun 2020. Í evru­skulda­bréfum hefði flöktið lækkað um 37,1%. Áhrifin á hluta­bréfa­vísitölur voru mun minni. Full gjald­eyris­vörn hefði lækkað flökt FTSE 100-vísitölunnar um 8,3%. Í Stoxx 600 hefði flöktið aukist um 0,1% og því verið nær óbreytt, en í S&P 500 hefði það aukist um 3,3%. Skýringin er meðal annars sú að ís­lenska krónan hefur haft neikvæða fylgni við bandarísk hluta­bréf á tíma­bilinu. Þegar hluta­bréfin lækkuðu gat dollarinn styrkst gagn­vart krónunni og þannig vegið að hluta upp tapið fyrir óvarinn krónu­fjár­festi. Full gjald­eyris­vörn hefði tekið þessi mót­vægisáhrif úr sam­bandi. Ís­lenskur fjár­festir sem kaupir er­lend skulda­bréf tekur á sig hlut­falls­lega mikla gengisáhættu án þess að fá sér­staka um­bun fyrir hana í formi hærri ávöxtunar­kröfu. Ávöxtunar­krafa er­lends skulda­bréfs tekur al­mennt mið af láns­hæfi út­gefandans, vaxta­stigi og aðstæðum á heima­markaði bréfsins. Hún tekur hins vegar ekki sér­stakt til­lit til þess að fjár­festir reikni ávöxtun sína í ís­lenskum krónum. Gengis­sveiflur krónunnar bætast því við áhættu skulda­bréfsins án þess að vextir þess hækki af þeim sökum. „Þess vegna er skil­virkniávinningur þess að verja skulda­bréf al­mennt meiri en af því að verja hluta­bréf,“ segir í greiningunni. Í sögu­legum saman­burði Kviku hefði gjald­eyris­vörn skulda­bréfa bæði dregið úr flökti og aukið reiknaða ávöxtun vegna jákvæðs fram­virks vaxta­munar. Hlut­falls­leg áhrif beggja þátta eru meiri í skulda­bréfum, enda eru ávöxtun þeirra og flökt að jafnaði minni en í hluta­bréfum.