Söluþrýstingur á alþjóð­legum skulda­bréfa­mörkuðum jókst enn í og ýtti lántöku­kostnaði ríkja víða upp. Ávöxtunar­krafa breskra ríkis­skulda­bréfa fór í hæstu hæðir frá fjár­mála­kreppunni 2008 og ávöxtunar­krafa japanskra ríkis­skulda­bréfa náði hæstu gildum frá tíunda ára­tugnum. Þróunin kemur í kjölfar aukinna verðbólguáhyggja, hækkandi orku­verðs og vaxandi væntinga um að seðla­bankar þurfi að hækka vexti hraðar en áður var talið. Ávöxtunar­krafa tíu ára breskra ríkis­skulda­bréfa hækkaði um 0,1 pró­sentu­stig í 5,25% og hefur ekki verið hærri frá árinu 2008. Ávöxtunar­krafa 30 ára bréfa hækkaði jafn­framt í 5,9%, það hæsta frá því seint á tíunda ára­tugnum. Í Japan fór ávöxtunar­krafa tíu ára ríkis­skulda­bréfa tíma­bundið í 3%, hæsta gildi frá árinu 1996. Ávöxtunar­krafa tíu ára bandarískra ríkis­skulda­bréfa hækkaði á sama tíma í 4,79%. Verð skulda­bréfa og ávöxtunar­krafa þeirra hreyfast í gagnstæðar áttir. Financial Times og Wall Street Journal rekja söluþrýstinginn meðal annars til endur­nýjaðrar spennu í Mið-Austur­löndum og hækkandi orku­verðs. Brent-hráolía hækkaði um 2,1% á þriðju­dag í 92,38 dali á tunnu og verð á jarðgasi í Evrópu er komið í hæstu hæðir í meira en þrjú ár. Verðbólga á evru­svæðinu jókst jafn­framt í 3,3% í ágúst úr 2,9% í júlí og mældist verðbólga vegna orku­kostnaðar 14,3%. Vaxandi væntingar eru nú um frekari vaxta­hækkanir beggja vegna At­lants­hafs. Fjár­festar verð­leggja um tveggja þriðju líkur á því að bandaríski seðla­bankinn hækki vexti um 0,25 pró­sentu­stig síðar í septem­ber. Fyrir viku voru líkurnar metnar rétt undir 40%. Harðari tónn Kevins Warsh, nýs seðla­banka­stjóra Bandaríkjanna, á Jack­son Hole-ráð­stefnunni í síðustu viku hefur einnig aukið væntingar um frekari aðhaldsað­gerðir. Söluþrýstingurinn á skulda­bréfum hefur jafn­framt smitast yfir á hluta­bréfa­markaði. Stoxx Europe 600-vísi­talan lækkaði um 0,7% og fram­virkir samningar á S&P 500 bentu til um 0,6% lækkunar við opnun markaða í Bandaríkjunum. Auknar áhyggjur af ríkis­fjár­málum hafa einnig ýtt undir hækkun ávöxtunar­kröfu, einkum í Bret­landi og Japan. Fjár­festar hafa áhyggjur af aukinni lántöku ríkja á sama tíma og fjár­mögnunar­kostnaður hækkar. Eric Robert­sen, yfir­maður alþjóð­legrar greiningar hjá Standard Chartered, sagði við FT að ríki væru að auka lántökur á sama tíma og kostnaður við fjár­mögnun færi hækkandi. Að hans mati vantaði nú skýran akkeris­punkt fyrir lengri enda vaxtakúrfunnar meðan ríkis­fjár­mál héldust veik. Í Japan hefur um­fangs­mikil út­gjaldaáætlun stjórn­valda aukið þrýsting á skulda­bréfa­markaðinn. Markaðurinn verð­leggur nú miklar líkur á því að Japans­banki hækki stýri­vexti um 0,25 pró­sentu­stig í 1,25% á fundi sínum síðar í septem­ber.