Tekjur af vöru- og þjónustusölu Alvotech drógust saman um nærri helming á fyrri helmingi ársins og námu 105,9 milljónum dala, samanborið við 204,7 milljónir dala á sama tíma í fyrra. Heildartekjur lækkuðu minna, úr 306 milljónum dala í 211,6 milljónir, þar sem leyfis- og aðrar tekjur námu 105,7 milljónum dala og voru því nánast jafnháar vöru- og þjónustutekjunum. Tekjusamsetningin er svipuð þeirri sem sást undir lok síðasta árs. Viðskiptablaðið fjallaði þá um að leyfis- og aðrar tekjur bæru uppi afkomuna á sama tíma og vörusalan dróst verulega saman. Á fjórða ársfjórðungi síðasta árs nam vöru- og þjónustusala aðeins um fjórðungi heildartekna félagsins. Leyfis- og áfangatekjur eru mikilvægur hluti af viðskiptamódeli Alvotech og myndast meðal annars þegar ákveðnum þróunar-, skráningar- eða viðskiptaáföngum er náð. Þær geta hins vegar sveiflast verulega milli tímabila og eru ekki sama eðlis og stöðug og endurtekin lyfjasala. Á fyrri helmingi ársins voru meðal annars tekjufærðar 39,8 milljónir dala vegna leyfis- og markaðssamnings sem gerður var á öðrum ársfjórðungi við félag undir sameiginlegum yfirráðum eða áhrifum. Vöruframlegðin áfram lág Veikleiki vörusölunnar kemur einnig fram í framlegðinni. Kostnaður við seldar vörur og þjónustu nam 98,3 milljónum dala á móti 105,9 milljóna dala tekjum. Leiðrétt vöruframlegð nam 8% á fyrri helmingi ársins og aðeins 6% á öðrum ársfjórðungi. Alvotech rekur lága framlegð meðal annars til vörusamsetningar og minni framleiðslu meðan unnið var að endurbótum á framleiðsluaðstöðu og gæðakerfum félagsins. Heildarframlegð félagsins var aftur á móti 54%. Þar vega leyfis- og áfangatekjur þungt enda fylgir þeim ekki sami framleiðslukostnaður og vörusölunni. Það þarf þó ekki að vera veikleikamerki eitt og sér. Leyfistekjurnar eru hluti af þeirri stefnu sem Alvotech hefur byggt upp í kringum samstarf við önnur lyfjafyrirtæki, þar sem félagið þróar og framleiðir lyfin en samstarfsaðilar annast sölu þeirra á einstökum mörkuðum. Tekjurnar geta verið sveiflukenndar milli uppgjörstímabila en eru engu að síður hluti af viðskiptamódeli félagsins. Leiðrétt EBITDA nam 46,9 milljónum dala og dróst saman um 13% frá fyrra ári. EBITDA-framlegð hækkaði þó úr 18% í 22%. Áfangatekjur studdu við afkomuna en aukin eignfærsla þróunarkostnaðar hafði einnig áhrif. Rannsóknar- og þróunarkostnaður sem færður var beint til gjalda lækkaði úr 92,9 milljónum dala í 46,4 milljónir. Stærsti hluti þróunarkostnaðar er nú færður til eignar þar sem fleiri verkefni uppfylla að mati félagsins skilyrði alþjóðlegra reikningsskilareglna um eignfærslu. Sá kostnaður hverfur ekki úr reikningunum heldur er færður sem eign og gjaldfærður síðar. Félagið fjárfesti alls fyrir 91 milljón dala á hálfsárinu. Þar af fóru 35 milljónir í framleiðsluaðstöðu og aðra innviði en um 56 milljónir aðallega í þróunarverkefni sem voru eignfærð. Rekstrartap samkvæmt IFRS nam tveimur milljónum dala, samanborið við 28,6 milljóna dala rekstrarhagnað á fyrri helmingi síðasta árs. Þar hafði einnig áhrif 20,2 milljóna dala gjaldfærsla vegna viðskipta- og samningsmála. Alvotech upplýsir ekki hvaða samningar eða gagnaðilar eiga þar í hlut en segir færsluna byggja á mati stjórnenda á líklegu tapi vegna fyrirliggjandi samninga. Endanleg niðurstaða geti orðið önnur. Bókhaldslegar hreyfingar hafa áfram mikil áhrif Tap Alvotech eftir skatta nam 65,8 milljónum dala á fyrri helmingi ársins, samanborið við 141,7 milljóna dala hagnað á sama tíma í fyrra. Bókhaldslegar hreyfingar skýra þó stóran hluta þess munar. Fjármagnstekjur félagsins námu 17 milljónum dala á fyrri helmingi ársins, en 149,2 milljónum dala á sama tíma í fyrra. Þar af komu 15,3 milljónir dala í ár vegna endurmats á afleiðuskuldbindingum, samanborið við 147,2 milljónir dala í fyrra. Þessar skuldbindingar eru færðar á gangvirði samkvæmt reikningsskilareglum. Þegar bókfært virði þeirra lækkar er lækkunin færð til tekna, án þess að nokkurt handbært fé skapist. Viðskiptablaðið hefur áður fjallað um að stór hluti þessara skuldbindinga tengist réttindum sem fyrri eigendur Alvotech fengu við skráningu félagsins árið 2022. Þeir eiga rétt á viðbótarhlutum nái hlutabréfaverð félagsins ákveðnum mörkum. Þegar minni líkur eru taldar á að þau skilyrði verði uppfyllt lækkar bókfært virði skuldbindingarinnar og sú lækkun færist til fjármagnstekna. Sjá einnig Skuldabréfafjárfestar vörðu sig gegn gengissveiflum Af 15,3 milljóna dala tekjufærslunni á fyrri helmingi ársins komu 6,3 milljónir vegna endurmats á þessum skilyrtu hlutum. Þá komu 4,8 milljónir vegna endurmats á breytirétti sem fylgir breytanlegum skuldabréfum félagsins og 4,2 milljónir vegna endurmats á kauprétti sem varð til við skráningu félagsins. Bókfærður hagnaður fyrra árs og tapið nú eru því ekki bein mæling á breytingu í undirliggjandi rekstri. Á sama tíma í fyrra bætti endurmat afleiðuskuldbindinga 147,2 milljónum dala við bókfærða afkomu, samanborið við 15,3 milljónir nú. Vextirnir taka á sjóðstreymi Fjármagnskostnaður nam 81,8 milljónum dala á fyrri helmingi ársins, samanborið við 72,2 milljónir dala í fyrra. Vaxtakostnaður af lánum og öðrum skuldum nam 69,7 milljónum dala, vextir af leiguskuldbindingum rúmum fimm milljónum og rúmar sjö milljónir voru gjaldfærðar vegna kostnaðar við skuldafjármögnun. Greiddir vextir námu rúmum 72 milljónum dala á hálfsárinu. Viðskiptablaðið hefur áður fjallað um breytinguna sem varð á fjármögnun Alvotech á síðasta ári. Félagið hafði áður heimild til að greiða hluta vaxta með svonefndum PIK-greiðslum, þar sem vextir bætast við höfuðstól skuldarinnar í stað þess að vera greiddir strax. Eftir endurfjármögnun stærsta lánapakkans eru vextirnir í meira mæli greiddir jafnóðum í reiðufé. Vaxtaálag á stærsta láninu lækkaði en greiðslubyrðin kemur nú skýrar fram í sjóðstreymi félagsins. Á öðrum ársfjórðungi einum námu nettó vaxtagreiðslur 37 milljónum dala. Handbært fé frá rekstri samkvæmt IFRS var neikvætt um 80,2 milljónir dala á fyrri helmingi ársins, samanborið við 68,3 milljóna dala innstreymi á sama tíma í fyrra. Sjóðstreymi frá rekstri fyrir vexti og skatta var hins vegar neikvætt um 7,8 milljónir dala á hálfsárinu. Þar sást greinilegur bati milli fjórðunga. Eftir 25 milljóna dala útstreymi á fyrsta ársfjórðungi var sjóðstreymið jákvætt um 17 milljónir dala á þeim öðrum. Lausafjárstaðan styrkt þrátt fyrir miklar skuldir Bókfærðar vaxtaberandi lántökur Alvotech námu 1,306 milljörðum dala í lok júní og höfðu lítið breyst frá áramótum. Stærsta lánið er 1,068 milljarða dala veðtryggt lán sem ber SOFR-vexti að viðbættu sex prósentustiga álagi. Þar við bætist 100 milljóna dala lán með 12,5% vöxtum, 108 milljóna dala breytanlegt skuldabréf með 6,875% vöxtum og önnur lán. Vegnir meðalvextir lána félagsins námu 9,43% á fyrri helmingi ársins. Samningsbundinn höfuðstóll lána nam tæplega 1,384 milljörðum dala. Rúmlega 1,08 milljarðar eru á gjalddaga innan fjögurra ára. Þegar leiguskuldbindingar eru taldar með námu nettóskuldir um 1,31 milljarði dala í lok júní. Lausafjárstaðan hefur hins vegar styrkst töluvert á síðustu mánuðum. Alvotech aflaði 164,6 milljóna dala með hlutafjárútboði í júní og tryggði sér jafnframt 75 milljóna dala viðbótarlán frá fjárfestingarsjóðum í stýringu GoldenTree. Lánið ber 12,5% vexti og var dregið að fullu niður 10. ágúst. Félagið fékk þá 75 milljónir dala greiddar til að standa meðal annars undir veltufjárþörf og almennum rekstri. Alvotech hefur því aflað um 240 milljóna dala í nýju hlutafé og lánsfé frá því í júní. Handbært fé nam 142,8 milljónum dala í lok annars ársfjórðungs. Eigið fé var áfram neikvætt, eða um 191 milljón dala, en hafði batnað úr neikvæðu eigin fé upp á 284 milljónir dala um síðustu áramót. Sjá einnig Breskur sjóður með milljarðs skortstöðu í Alvotech Breytanlegu skuldabréfin skýra hluta skortsölunnar Breytanlega skuldabréfið sem Alvotech gaf út undir lok síðasta árs skýrir jafnframt hluta þeirrar skortstöðu sem hefur sést í hlutabréfum félagsins. Viðskiptablaðið greindi áður frá því að fjárfestum í skuldabréfunum stæði til boða vörn gegn gengissveiflum með því að fá hlutabréf að láni og selja þau á móti stöðu sinni. Í einföldu máli heldur fjárfestirinn vaxtaberandi skuldabréfi með möguleika á að breyta því síðar í hlutafé, en getur á sama tíma dregið úr áhættu vegna skammtímasveiflna í hlutabréfaverði með því að selja lánuð hlutabréf. Skortstaða sem verður til með þessum hætti er því ekki endilega veðmál um að gengi Alvotech muni lækka heldur hluti af áhættuvörn fjárfestisins. Nýja uppgjörið staðfestir að þetta fyrirkomulag hefur verið nýtt. Í febrúar gaf Alvotech út 12,5 milljónir nýrra hluta til dótturfélagsins Alvotech Manco til að endurnýja þann hlutabréfaforða sem hafði verið notaður vegna áhættuvarna eigenda breytanlegu skuldabréfanna. Framleiðslan komin aftur í fyrra horf Mesta breytingin frá síðasta uppgjöri er staðan í framleiðslunni. Endurbætur á verksmiðju og gæðakerfum Alvotech höfðu veruleg áhrif á framleiðslu og vöruframboð á fyrri helmingi ársins. Félagið segir framleiðslu hafa náð áætluðum afköstum á ný í lok annars ársfjórðungs og að nú sé verið að byggja upp birgðir til að mæta staðfestri eftirspurn. Staðan gagnvart bandaríska Matvæla og lyfjaeftirlitinu FDA hefur einnig skýrst. FDA lauk úttekt sinni á verksmiðjunni í júlí og flokkaði niðurstöðuna sem VAI. Það felur í sér að eftirlitið gerði athugasemdir við ákveðin atriði en taldi þau ekki kalla á formlegar aðgerðir gegn verksmiðjunni. Niðurstaðan skiptir félagið miklu enda höfðu athugasemdir við verksmiðjuna tafið umsóknir um markaðsleyfi og jafnframt haft áhrif á framleiðslu. Umsóknir vegna AVT05 og AVT06 hafa nú verið lagðar aftur fyrir FDA og samstarfsaðili Alvotech hefur gert það sama vegna AVT03. FD
Security News
Cybersecurity news aggregator