Japanska jenið og ríkis­skulda­bréf landsins lentu undir þrýsting í eftir að fjár­festar juku veðmál sín um frekari vaxta­hækkanir bæði í Bandaríkjunum og Japan. Jen veiktist um tíma niður fyrir 160 gagn­vart Bandaríkja­dal, en ávöxtunar­krafa bæði skammtíma- og tíu ára japanskra ríkis­skulda­bréfa fór í hæstu hæðir í meira en þrjá ára­tugi, að því er Financial Times greinir frá. Hreyfingarnar komu í kjölfar ræðu Kevin Warsh, seðla­banka­stjóra Bandaríkjanna, á ár­legri ráð­stefnu seðla­banka­manna í Jack­son Hole. Warsh sló þar fremur hauka­legan tón og sagði nýjustu verðbólgutölur áhyggju­efni. Megin­áhersla Seðla­bankans ætti nú að vera á verðstöðug­leika, að hans sögn, sem jók væntingar um mögu­lega vaxta­hækkun strax á næsta vaxtaákvörðunar­fundi. Masa­hik­o Loo, sér­fræðingur hjá Sta­te Street í Tókýó, segir við FT að bæði endur­verðlagning bandarískra vaxta eftir Jack­son Hole og aukin trú á að Japans­banki geti hækkað vexti strax í septem­ber hafi knúið söluþrýstinginn á japönsk skulda­bréf. Ávöxtunar­krafa tveggja ára japanskra ríkis­skulda­bréfa hækkaði í allt að 1,72% og hefur ekki verið hærri frá maí 1995. Ávöxtunar­krafa tíu ára bréfa fór um tíma í 2,95%, sem er hæsta stig frá 1996. Markaðurinn metur nú líkurnar á vaxta­hækkun Japans­banka í næsta mánuði yfir 90%. Viðvarandi verðbólga og þrýstingur á seðla­bankann um að styðja við jenið hafa að mati markaðsaðila flýtt fyrir vaxta­hækkunar­ferlinu. Jen hefur verið undir mikilli smá­sjá frá því japönsk stjórn­völd vörðu met­fjár­hæð, 96,5 milljörðum dala, í júlí og ágúst til að styðja við gjald­miðilinn í sam­vinnu við bandarísk stjórn­völd. Jen hefur síðan tapað meira en helmingi þeirrar styrkingar sem fylgdi inn­gripunum. Þrátt fyrir að hærri japanskir vextir ættu að öðru óbreyttu að styðja við jenið hefur það ekki enn gerst með af­gerandi hætti. Abbas Kes­hvani, sér­fræðingur hjá RBC Capi­tal Markets, segir við FT að hærri ávöxtunar­krafa sé vissu­lega aðlaðandi fyrir fjár­festa en svo lengi sem hún haldi áfram að hækka sé erfitt að byggja upp trú á japönskum skulda­bréfum. Markaðurinn þurfi fyrst og fremst stöðug­leika. Um­mæli bandaríska fjár­málaráðherrans Scott Bes­sent um helgina styrktu jafn­framt væntingar um að Bandaríkin vilji frekar sjá Japans­banka hækka vexti en að japönsk stjórn­völd grípi aftur til beinna gjald­eyrisinn­gripa. Á sama tíma varð lítil hreyfing á bandarískum ríkis­skulda­bréfum. Ávöxtunar­krafa tíu ára bandarískra ríkis­skulda­bréfa lækkaði lítil­lega í 4,71%.