Lántöku­kostnaður þýska ríkisins hefur ekki verið hærri í 15 ár eftir að söluþrýstingur á evrópskum skulda­bréfa­mörkuðum jókst enn í dag. Ávöxtunar­krafa tíu ára þýskra ríkis­skulda­bréfa hækkaði í 3,38%, það hæsta frá árinu 2011. Þýsk ríkis­skulda­bréf eru al­mennt talin viðmið fyrir verðlagningu ríkis­skulda á evru­svæðinu og hækkunin endur­speglar því víðtækari þrýsting á evrópska skulda­bréfa­markaðinn. Svipaða þróun má sjá í Frakk­landi þar sem ávöxtunar­krafa tíu ára ríkis­skulda­bréfa hækkaði í 4,25%. Hún hefur ekki verið jafn há frá árinu 2008. Bresk ríkis­skulda­bréf hafa þó orðið enn verr úti í sölunni. Ávöxtunar­krafa tíu ára breskra ríkis­skulda­bréfa fór í 5,25% á mið­viku­dag og hefur ekki verið hærri frá árinu 2007. Ávöxtunar­krafa 30 ára breskra ríkis­skulda­bréfa hækkaði jafn­framt í 5,89%, hæsta gildi frá árinu 1998. Hækkunin eykur þrýsting á bresk ríkis­fjár­mál, enda þýðir hærri ávöxtunar­krafa að ríkis­sjóður þarf að greiða meira fyrir nýja lántöku og endur­fjár­mögnun skulda. The Telegraph segir ótta fjár­festa við að stríðið við Íran haldi verðbólgu þrálátri vera meðal þess sem ýtir undir söluna á skulda­bréfa­mörkuðum. Jim Reid, sér­fræðingur hjá Deutsche Bank, benti á að bresk ríkis­skulda­bréf hefðu verið þau sem komu verst út meðal helstu þróaðra ríkja í dag. Sér­stak­lega væri horft til þess að hækkandi fjár­magns­kostnaður dragi úr svigrúmi bresku ríkis­stjórnarinnar gagn­vart eigin ríkis­fjár­mála­reglum. Þróunin kemur því á óheppi­legum tíma fyrir stjórn­völd í Evrópu. Í Þýska­landi er viðmiðslántöku­kostnaður ríkisins nú sá hæsti í 15 ár, í Frakk­landi sá hæsti frá fjár­mála­kreppunni og í Bret­landi hefur langtímalántöku­kostnaður ekki verið jafn hár í nær þrjá ára­tugi.