Verðbólga hefði verið um 4,8% í júlí ef áhrif skatta og verðhækkana á opin­berri þjónustu væru undan­skilin. Það hefði haldið verðbólgunni undir því marki sem skiptir máli við endur­skoðun kjara­samninga. Skattaáhrif og verðhækkanir á opin­berri þjónustu bættu um hálfu pró­sentu­stigi við verðbólgu í júlí. Þetta kemur skýrt fram í fundar­gerð peninga­stefnu­nefndar Seðla­banka Ís­lands sem birtist í vikunni. Verðbólga mældist 5,3% í júlí en án þessara áhrifa hefði hún verið um 4,8%. „Verðbólga mældist 5,3% í júlí og jókst um 0,1 pró­sentu milli mánaða. Án skattaáhrifa og verðhækkana á opin­berri þjónustu var hún hins vegar um 0,5 pró­sentum minni,“ segir í fundar­gerðinni. Sjá einnig Tómas vildi halda vöxtum óbreyttum Munurinn skiptir máli vegna endur­skoðunar kjara­samninga síðar á árinu. Miðað við þau verðbólgu­viðmið sem greiningar­deildir við­skipta­bankanna hafa horft til við mat á for­senduákvæðum samninganna hefði verðbólgan haldist undir viðkomandi marki ef ekki hefði komið til skattaáhrifa og verðhækkana á opin­berri þjónustu. Sam­kvæmt Seðla­bankanum voru það hins vegar opin­berar ákvarðanir sem hækkuðu mælda verðbólgu úr um 4,8% í 5,3% í júlí. Peninga­stefnu­nefnd gengur raunar lengra í mati sínu á þróuninni og segir að hækkun opin­berra gjalda hafi verið einn helsti þátturinn á bak við aukna mælda verðbólgu. „Aukning mældrar verðbólgu hafði fyrst og fremst litast af hækkun opin­berra gjalda og áhrifum stríðsá­taka í Mið-Austur­löndum,“ segir Seðla­bankinn. [áhersla vb.is] Sjá einnig Aukin verðbólga „fyrst og fremst“ vegna hækkunar opin­berra gjalda Þá kemur fram að opin­berar verðhækkanir séu ekki að fullu komnar fram. Seðla­bankinn gerir ráð fyrir að verð opin­berrar þjónustu hækki áfram á næstu mánuðum, meðal annars vegna fyrir­hugaðra hækkana á gjöldum fyrir heil­brigðisþjónustu og skráningar­gjöldum við Háskóla Ís­lands. Peninga­stefnu­nefnd hefur jafn­framt sér­stak­lega rætt mögu­lega endur­skoðun kjara­samninga síðar á árinu sem áhættuþátt fyrir verðbólgu, enda geti aukin verðbólga og háar verðbólgu­væntingar aukið þrýsting á laun og verðlag Sjá einnig „Það eru engin fórnarlömb hér“