Íslensk útgáfa barnabókarinnar Geymdu akörnin þín (e. Save Your Acorns) eftir Robert Gardner er komin út en bókin er sniðin að börnum á aldrinum fimm til sjö ára. Útgáfan er samstarfsverkefni Roberts Gardner, Haga, Viðskiptablaðsins og Framtíðarsýnar. Markmiðið er að sem flest íslensk börn eignist bókina og fái tækifæri til að kynnast grundvallaratriðum fjármálalæsis snemma á lífsleiðinni. Bókin verður seld á kostnaðarverði, 500 krónur eintakið, í Hagkaupum á meðan birgðir endast. Robert Gardner afsalar sér jafnframt höfundalaunum vegna íslensku útgáfunnar. Robert segir viðhorf og venjur ekki síður skipta máli en þekkingu þegar kemur að peningum. „Margir halda að fjármálafræðsla felist í því að fræða börn um húsnæðislán, lánsfé, vexti og þess háttar. Það er vissulega hluti af henni. Fjárhagsáætlanir og langtímafjárfestingar snúast aftur á móti ekki síður um hegðun og venjur en þekkingu. Fullorðið fólk skilur oft ekki hvernig tryggingar eða lífeyrir virka en vandinn er líka sá að það treystir sér ekki til að spyrja réttu spurninganna. Fólk þarf alls ekki að vera sérfræðingar í fjármálum en það verður þó að gæta þess að skella ekki skollaeyrum við eigin fjármálum.“ Hann bendir á að framfarir í fjármálaþjónustu, á borð við snertilausar greiðslulausnir, geri foreldrum þó erfiðara um vik við að kenna börnum sínum að fara vel með peninga. „Það gengur nánast enginn um með seðla eða mynt lengur. Áður borgaði fólk fyrir allar vörur og þjónustu með seðlum og mynt. Það gerði það að verkum að eyðslan var mjög sýnileg. Í dag fer það út í búð og tekur jafnvel ekki eftir verðinu. Fólk hefur því miður misst yfirsýn yfir peningana sína.“ Það sé ekki síst vegna þessa sem Robert vilji beina sjónum að venjum tengdum fjármálum inn í umræðuna. „Við erum auðvitað ekki að reyna að kenna litlum börnum flókin fjármálahugtök. Lykilatriðið er að fjármálafræðsla þarf að vara alla ævi. Hún þarf að vera kennd í grunnskóla, framhaldsskóla og háskóla og þarf um leið að taka mið af aðstæðum. Það þarf að kenna fólki réttu upplýsingarnar á réttum tíma.“ Með því að byrja fjármálafræðslu í grunnskóla megi koma í veg fyrir að fólk óttist að tala um peninga. „Í könnun sem framkvæmd var í Bretlandi kom m.a. fram að foreldrar vildu frekar ræða við börnin sín um kynlíf en peninga. Þeim fannst þeir einfaldlega öruggari með fyrra umræðuefnið. Ef fólk skilur ekki peninga skortir það sjálfstraust til að ræða þá. Foreldrar barna sem fá fjármálafræðslu hjá góðgerðarsamtökunum okkar hafa tjáð okkur að tíu eða ellefu ára börnin þeirra séu orðin öruggari og skilji peninga betur en þau sjálf. Foreldrarnir eru vitaskuld mjög þakklátir en þessu fylgir þó einnig ákveðin skömm. Í grunnskóla er auðvitað ekki verið að kenna börnum það sama og átján ára ungmennum, heldur er verið að leggja grunninn. Það sama gildir um fjármálafræðslu. Við erum að móta venjur, viðhorf og hugarfar sem hægt er að byggja stöðugt upp meðfram því sem börnin eldast.“ Nánar er fjallað um málið í Viðskiptablaðinu . Áskrifendur geta lesið fréttina í heild hér .