Hildur Sverris­dóttir þing­maður Sjálf­stæðis­flokksins sagði skýrt í um­ræðum á Alþingi að þrátt fyrir gefin lof­orð ríkis­stjórnarinnar um að hækka ekki skatta á venju­legt launafólk væru allir launa­menn á Ís­landi að fara að greiða hærri tekju­skatt. Ástæðan væri fyrir­huguð breyting á fram­leiðni­viðmiði sem notað er við ár­lega upp­færslu skatt­leysis- og skattþrepa­marka. Hildur sagði ríkis­stjórnina þar með fara bak­dyra­megin að al­mennri skatta­hækkun, þótt for­maður Viðreisnar hefði áður sagt að engar breytingar yrðu gerðar á tekju­skatti. „Allir á Ís­landi eru að fara að borga hærri tekju­skatt,“ sagði Hildur í um­ræðum um svo­nefndan band­orm ríkis­stjórnarinnar vegna fjár­laga 2027 og beindi gagn­rýni sinni að Daða Má Kristó­fers­syni fjár­málaráðherra. Að mati Hildar er nú verið að gera nákvæm­lega það, aðeins með óbeinum hætti. „Hver einasti launa­maður í landinu, hver einn og einasti launa­maður í landinu, [er] að borga hærri skatt í öllum skattþrepum, í öllum tekju­tíundum,“ sagði Hildur og bætti við: „Allir á Ís­landi eru að fara að borga hærri tekju­skatt.“ Hún gagn­rýndi jafn­framt rökstuðning stjórn­valda fyrir breytingunni og benti á að í greinar­gerð frum­varpsins væri sér­stak­lega vísað til þess að skatt­byrði hefði undan­farin ár lækkað mest, meðal annars hjá fólki í neðstu tekju­tíundunum. „Ráðu­neytið [er] sér­stak­lega að varpa ljósi á að þeir sem eru með 450.000 kr. á mánuði, það þurfi að hækka skattana á þetta fólk,“ sagði Hildur. Skilar ríkinu þremur milljörðum Sam­kvæmt greinar­gerð fjár­mála- og efna­hags­ráðu­neytisins hefur fram­leiðni­viðmið við upp­færslu skatt­leysis- og skattþrepa­marka verið 1% á ári. Ráðu­neytið telur hins vegar að fram­leiðni hafi vaxið hægar en gert var ráð fyrir og leggur því til að viðmiðið verði 0% árið 2027 og 0,5% næstu ár þar á eftir. Áætlað er að breytingin skili ríkis­sjóði 3,1 milljarði króna í auknar tekjur árið 2027. Hildur sagði ríkis­stjórnina því hafa tekið meðvitaða ákvörðun um að sækja þessa fjár­muni til launafólks þótt að hennar mati hefði verið hægt að sleppa breytingunni og engu að síður leggja fram halla­laus fjár­lög. „Það hefði mátt sleppa þessu en samt skila halla­lausum fjár­lögum,“ sagði hún og spurði hvers vegna ríkis­stjórnin hefði ákveðið „að senda þennan reikning til allra launa­manna í landinu“. Daði segir for­sendurnar ekki hafa staðist Daði Már hafnaði þeirri túlkun að breytingin væri ein­fald­lega al­menn skatta­hækkun. Hann sagði fram­leiðni­viðmiðið hafa verið sett inn í skatt­kerfið til að tryggja að skatt­leysis- og skattþrepamörk hækkuðu um­fram verðbólgu að því marki sem fram­leiðni ykist. Endur­skoðun hefði nú sýnt að fram­leiðni­aukningin hefði ekki orðið eins mikil og gert var ráð fyrir. „Þá kemur í ljós að það var engin fram­leiðni­aukning til að taka til að rétt­læta þessa þróun,“ sagði ráðherrann og vísaði til þess að viðmiðið yrði því lækkað úr 1% í 0,5%, auk þess sem það yrði tíma­bundið 0% á næsta ári. Daði sagði breytinguna aðeins leiða til hærri skatt­greiðslna eftir því sem laun hækkuðu og lagði áherslu á að verið væri að laga upp­færslu skatt­kerfisins að þróun fram­leiðni. Hildur taldi svarið ekki taka á kjarna gagn­rýni sinnar. Hún benti á að sam­kvæmt fyrra fyrir­komu­lagi hefði endur­skoðun fram­leiðni­viðmiðsins ekki átt að koma til fram­kvæmda fyrr en ári síðar. „Ríkis­stjórnin kýs hérna, án neinnar sýni­legrar ástæðu nema að klípa enn þá meira af hverju einasta heimili í landinu, að fara í þessa veg­ferð,“ sagði hún. Hún sagði ráðherrann ekki hafa út­skýrt hvers vegna ríkis­stjórnin hefði ákveðið að flýta breytingunni um eitt ár. Deildu einnig um ferðaþjónustuna Hildur beindi síðar sjónum að aukinni skatt­heimtu af ferðaþjónustu og gagn­rýndi meðal annars fyrir­hugaða færslu baðlóna úr 11% virðis­auka­skattsþrepi í 24%. Hún spurði hvort stjórn­völd hefðu metið sam­keppnisáhrif breytinganna á ís­lenska ferðaþjónustu og sagði mikilvægt að horfa til þess að greinin væri í beinni sam­keppni við áfangastaði er­lendis. Daði Már sagði hins vegar óeðli­legt að bera fyrir­hugaða skatt­heimtu beint saman við hagnað ferðaþjónustu­fyrir­tækja. Inn­viða­gjöld væru hugsuð þannig að ferða­menn bæru þau og hið sama ætti að stórum hluta við um virðis­auka­skatt, sem lík­legt væri að fyrir­tækin veltu út í verð. Hann sagði áhrifin því fyrst og fremst ráðast af því hvort hærra verð drægi úr eftir­spurn eftir þjónustunni.