Amaroq Minerals var með 27 milljónir kana­da­dala í tekjur á árinu 2025, fyrsta árið sem félagið hefur veru­legar tekjur af gullsölu frá Nalunaq-námunni á Suður-Græn­landi. Þrátt fyrir það tapaði félagið 18,6 milljónum dala á árinu, saman­borið við 23,5 milljóna dala tap árið áður. Tekjurnar komu af sölu á 5,31 þúsund únsum af gulli. Þegar beinn kostnaður við söluna hafði verið dreginn frá stóðu eftir 11,1 milljón dala. Rekstrar­tapið nam hins vegar 18,2 milljónum dala, meðal annars vegna mikils kostnaðar við rannsóknir, þróun og stjórnun. Eldur Ólafs­son, for­stjóri Amaroq, segir árið 2025 hafa verið afar árangurs­ríkt fyrir félagið. Hann bendir á að fyrsta áfanga Nalunaq-námunnar hafi verið lokið og að fram­leiðslu­mark­mið ársins, 6 til 7 þúsund únsur af gulli, hafi náðst. Heildar­fram­leiðslan nam 6,35 þúsund únsum og var því í samræmi við áætlanir. „Við til­kynnum jafn­framt í dag að við munum brátt ljúka við sam­komu­lag um nýja 70 milljón bandaríkja­dala lána­línu sem er hækkun um 35 milljónir á núverandi lána­línu okkar. Sam­hliða hækkuninni er gert ráð fyrir lægra vaxtaálagi sem mun draga úr fjár­magns­kostnaði og auka sveigjan­leika í lausa­fjár­stýringu. Þessi viðbót, ásamt sterku sjóð­streymi frá rekstri, mun styrkja efna­hags­reikning okkar veru­lega,“ segir Eldur í uppgjörinu. Stjórn­endur segja jafn­framt að fram­leiðsla það sem af er árinu 2026 sé í takt við væntingar. Á fyrri helmingi ársins er stefnt að 7 til 10 þúsund únsum og fyrir allt árið er mark­miðið 25 til 35 þúsund únsur. Félagið gerir ráð fyrir að fram­leiðslan aukist sér­stak­lega á seinni helmingi ársins þegar annar áfangi vinnslunnar verður kominn í fullan gang. Amaroq reiknar með að endur­heimt gulls fari upp í 90 til 95% eftir að nýr vinnsluá­fangi verður tekinn í notkun á öðrum árs­fjórðungi. Fram­kvæmdir við þann áfanga eru sagðar ganga sam­kvæmt áætlun. Efna­hagur félagsins stækkaði tals­vert á árinu. Heildar­eignir námu 354,5 milljónum dala í árs­lok, saman­borið við 256 milljónir dala ári áður. Eigið fé nam 280,1 milljón dala, upp úr 201,2 milljónum dala árið áður. Hand­bært fé dróst hins vegar saman og nam 21,5 milljónum dala í lok árs, saman­borið við 45,2 milljónir dala ári fyrr. Á sama tíma jukust birgðir veru­lega og námu 25,6 milljónum dala í árs­lok. Þar af var gull­birgðastaðan metin á 15,8 milljónir dala. Lækkun á hand­bæru fé skýrist meðal annars af mikilli fjár­festingu á árinu. Félagið segir 97% verka í fyrsta áfanga Nalunaq hafa verið lokið og að allir lykilþættir fyrir annan áfanga séu komnir á sinn stað. Þá tók Amaroq sjálft yfir allan neðanjarðarnámu­rekstur frá og með 1. október í stað þess að styðjast við verk­taka. Að sögn félagsins hefur það þegar skilað aukinni fram­leiðni. Amaroq safnaði 83 milljónum dala í hluta­fjárút­boði í júní á síðasta ári. Þá lauk félagið í desember kaupum á Black Angel-námunni og Kangerlu­ar­suk-leyfunum og lagði þar með grunn að nýrri starf­semi á vestur­hluta Græn­lands. Amaroq vinnur jafn­framt að fjár­mögnun þjónustu­félagsins Suli­aq, sem ætlað er að þjónusta vaxandi námu­starf­semi á Græn­landi. Þar er stefnt að því að afla 20 til 35 milljóna Bandaríkja­dala í nýtt hluta­fé. EIFO, fjár­festinga­sjóður á vegum danska ríkisins og einn stærsti hlut­hafi félagsins, hefur lokið frum­at­hugun og lýst yfir áhuga á mögu­legri þátt­töku. Kostnaður vegna rannsókna og mats­verk­efna nam 10,9 milljónum dala á árinu og al­mennur stjórnunar­kostnaður 19 milljónum dala. Félagið bók­færði einnig 2,1 milljón dala tap af hlut­deild sinni í sam­eigin­legu verk­efni. Á árinu 2026 hyggst Amaroq halda áfram upp­byggingu á fleiri verk­efnum í Græn­landi. Þar má nefna frekari boranir á Nanoq-svæðinu, áfram­haldandi vinnu við Nalunaq og þróun Black Angel-námunnar, þar sem stefnt er að fyrsta áfanga vinnslu árið 2028. Stjórn­endur benda á að niður­stöður úr rannsóknum hafi verið sterkar. Á Nanoq hafi fundist um­tals­verð gull- og kopar­steinda­myndun og á Black Angel hafi sýni bent til hás inni­halds af sinki, blýi og silfri, auk þess sem þar hafi einnig greinst málmar á borð við germaníum og gallíum