Grásleppubátar hafa nú landað um þúsund tonnum, en það er 30% minni afli en á sama tíma í fyrra. Rúmum fimmtungi færri hafa hafið veiðar eða alls 102 bátar. Frá þessu segir á heimasíðu Landssambands smábátaeigenda. Mest hefur verið landað á Bakkafirði alls 131 tonni og aflahæsti báturinn yfir landið er Norðurljós NS40 með 31,1 tonn. Útgefið aflamark er 2.914 tonn, en það er 9% aukning frá síðasta ári. Þegar veiðum er stjórnað með aflamarki bætist við opin heimild til tegundatilfærslu sem nú er komin í 156 tonn. Þannig öðlast skip sem engar heimildir hafa í grásleppu leyfi til veiða. Dæmi um 20 tonna afla í botnvörpu hjá skipi þar sem aflamark í grásleppu er núll. Miklar verðsveiflur eru einkennandi fyrir grásleppumarkaðinn. Danir hafa keypt héðan fersk hrogn og hafa verð haldist góð fram að páskum. Eftir þann tíma fer eftirspurn minnkandi og við tekur aukið framboð samfara því að vertíð nær hámarki. Taflan að neðan sýnir verð og magn á fiskmörkuðunum á síðastliðnum þremur árum fyrir grásleppu sem veidd er í grásleppunet. Tímabilið er 1. mars til 26. apríl ár hvert. „Grásleppusjómenn eru bjartsýnir á að yfirstandandi vertíð skili þeim góðum verðum. Eftirspurn á grásleppu og hrognum hefur aukist samfara minni veiði allra þjóða á vertíðinni 2025. Þrátt fyrir að hér hafi heimildir verið auknar er ekki búist við að heildarafli aukist þar sem Grænlendingar skertu sitt aflahámark um 10%.“ Útflutningsverðmæti grásleppuafurða árið 2025 nam 1,6 milljarði.