Japanska jenið hefur ekki verið veikara gagnvart Bandaríkjadal síðan árið 1986 eða í fjóra áratugi. Þróunin hefur aukið væntingar um að japönsk stjórnvöld kunni að grípa á ný inn í gjaldeyrismarkaðinn til að styðja við gjaldmiðilinn. Frá þessu greinir Reuters. Dollarinn fór hæst í 162,41 jen í viðskiptum dagsins en stóð síðar í 162,15 jenum. Fjármálaráðherra Japans, Satsuki Katayama, ítrekaði að stjórnvöld væru reiðubúin til að grípa til aðgera eftir þörfum, án þess þó að gefa sterkari vísbendingar um yfirvofandi inngrip. Veik staða jensins skýrist einkum af miklum vaxtamun milli Japans og Bandaríkjanna. Þrátt fyrir nýlega vaxtahækkun Seðlabanka Japans eru vextir þar enn mun lægri en í Bandaríkjunum, sem gerir fjárfestum hagkvæmt að taka lán í jenum og fjárfesta í gjaldmiðlum sem bera hærri vexti. Markaðsaðilar telja jafnframt að auknar líkur séu á frekari vaxtahækkunum af hálfu bandaríska seðlabankans, þar sem verðbólga í Bandaríkjunum hefur reynst þrálát samhliða traustum hagvexti. Nýjar spár frá bankanum sýna að nær helmingur stefnumótenda gerir ráð fyrir að vextir hækki enn fyrir lok árs. Jenið hefur nú veikst fjórða ársfjórðunginn í röð gagnvart dollar og er það lengsta samfellda lækkunartímabil gjaldmiðilsins í fjögur ár. Japönsk stjórnvöld gripu síðast inn í gjaldeyrismarkaðinn í apríl og maí og vörðu þá um 11,7 billjónum jena, jafnvirði rúmlega 72 milljarða Bandaríkjadala, til að styðja við gjaldmiðilinn. Áhrif þeirra aðgerða hafa hins vegar að mestu gengið til baka. Sérfræðingar telja líklegt að gripið verði inn í síðar á árinu, þótt stjórnvöld kunni að sýna meiri varfærni en áður, þar sem fyrri aðgerðir hafi ekki snúið við undirliggjandi þróun á mörkuðum. Athygli fjárfesta beinist nú að bandarískum atvinnutölum sem birtar verða síðar í vikunni, en þær gætu haft afgerandi áhrif á væntingar um næstu skref í vaxtamálum og þar með þróun helstu gjaldmiðla heims.